«Тошкент 5 ташаббус ҳаракати» иккинчи кунида ҳам ҳукумат вакиллари билан учрашувлар ўтказилди. Олий ва ўрта махсус таълим вазири Абдуқодир Тошқуловнинг ёшлар билан очиқ мулоқоти кўпчиликнинг диққат марказида турди.

Фото: «Дарё» / Мадина Нурман

Тадбир давомида иштирокчилардан бири ОТМларга имтиҳонсиз қабул тизимини жорий қилиш таклифини илгари суриб, хориждаги аксарият олийгоҳларда талабалар ўқув жараёнида саралаб олинишини мисол қилиб келтирди. Вазир бунга атрофлича тушунтириш берди.

Маълумки, хориждаги ОТМларда қабул осон, битириш қийин. Бизда эса кўпчиликда бунинг акси – ўқишга кириш қийин, битириш осондек туюлади. Хориждагидек тартиб амал қилишини мен ҳам хоҳлайман. Лекин битта масала: бизда бу ўзбекчилик-да, 300 дан 1000 кишигача ошларимиз бор экан, талабани ўқишдан четлатиб бўлмайди, менимча. Гапимнинг маъносини тушундингиз деб ўйлайман. Лекин бу сизнинг таклифингиз бўлмайди дегани эмас. Биз шунга қараб интиляпмиз. Қайси ОТМда шаффоф муҳит бўлса, гуруҳда яхши ўқиган талаба кейинги курсга ўтиб, ўқимагани курсдан қолса, ана ўша ерда буни жорий қилса бўлади.

Мен вазир сифатида ҳозир яна бир таклиф билан чиқяпман. Талабаларни ўқишга қабул қилишда ДТМ имтиҳон қилади, тўғрими?! Менинг таклифим, битираётганида ҳам давлат аттестацияларини ДТМ ўтказсин. Бу ўқитувчини ҳам ишлашга мажбур қилади. Лекин ҳозирча бу бизга тўғри келмайди. Сабаби боя айтганимдек, «бизда ошларимиз бор» деган жумла замирида жуда катта маъно бор.

Абдуқодир Тошқулов, олий таълим вазири

Эслатиб ўтамиз, ушбу учрашувда, шунингдек, вазир 96 минг ўринли талабалар ётоқхонасини қуриш учун 4,4 триллион сўм маблағ ажратилишини билдирган. Бундан аввал эса Тошқулов ОТМ ётоқхонасида бир талаба билан тонггача суҳбат қуриб, ундан бутун сир-асрорни сўраб олгани, талабалар ўлими билан боғлиқ воқеалардан сўнг маҳаллаларда талабабай юришлар бошланганини, Юнусободда мурдаси топилган беш талабанинг яқинларига моддий ёрдам кўрсатилганини айтган хабарлар ҳам чиққан эди.