Ўзбекистон Олий ва ўрта махсус таълим вазири Абдуқодир Тошқулов «Тошкент 5 ташаббус ҳаракати» доирасидаги очиқ мулоқот чоғида 96 минг ўринли талабалар ётоқхонасини қуриш учун 4,4 триллион сўм маблағ ажратилишини билдирди. Бу ҳақда «Дарё» мухбири хабар бермоқда.
«Бугунгача 58 минг ўринли талабалар турар жойлари бор эди, яъни эҳтиёжнинг 28 фоизи қондирилган. Айниқса, пандемия даврида талабалар қийналди. Муҳтарам Президентимиз 4,4 триллион сўм маблағ ажратиб, 2025 йилгача 96 минг ўринли ётоқхона қуришга топшириқ бердилар», — дейди вазир.
1 сентябргача каравотларни икки ярусли қилиш ҳисобига яна 35 мингта талабалар ўринлари ташкил қилиниши ҳам таъкидланди.
Мавзуга доир: Тошкентда ижарада яшайдиган беш талабанинг ўлимидан сўнг иккинчи чет эл университети филиалининг ётоқхонаси очилди
Маълумот учун, Ўзбекистон Президенти Шавкат Мирзиёев раислигида 2021 йилнинг 13 апрель куни ўтказилган видеоселекторда давлат раҳбари 1 майдан бошлаб талабаларга ижара тўловининг ярми давлат томонидан қоплаб берилиши маълум қилинганди. Шунга кўра, Президентнинг «Ёшларнинг тадбиркорлик фаолиятини қўллаб-қувватлаш ва бандлигига кўмаклашиш, уларни ижтимоий ҳимоя қилиш ҳамда бўш вақтини мазмунли ташкил этишга оид қўшимча чора-тадбирлар тўғрисида»ги фармони қабул қилинди.
Ҳужжатга мувофиқ, 2021 йил 1 майдан бошлаб ётоқхона билан қамраб олинмаган ва ўзига, шу жумладан, ота-онаси (қонуний вакиллари)га тегишли бўлмаган уйда ижара ҳуқуқи асосида яшайдиган давлат ОТМлари талабаларининг 60 фоизига улар томонидан тўланадиган ойлик ижара тўловининг 50 фоизи давлат бюджети ҳисобидан қоплаб берилади.
Мавзуга доир:
- Стрессга тушган талабалар, бир-биридан шубҳаланган ёшлар ва ҳар бир қаватга берилган қўйлар. Коронавирус аниқланган ЎзЖОКУ ётоқхонасида карантин қандай ўтмоқда?
- Ўзбекистонлик талабаларга Россияга киришга рухсат берилди
- Ўзбекистонда халқаро имтиҳон тизимларида юқори балл тўплаган ёшларга харажатлари қоплаб берилади
Изоҳ (0)