Тошкент вилояти Қибрай туманига қарашли 21 та маҳалла фуқаролар йиғини (жами 4402 гектар) Тошкент шаҳри таркибига ўтказилади. Бу ҳақда 20 май куни Халқ депутатлари Қибрай туман кенгашининг тегишли қарори қабул қилинган, деб хабар беради ҳуқуқшунос Хушнудбек Худойбердиев.
Маълум қилинишича, Қибрай туманидаги «Жарбоши», «Ташисти», «Ибрат», «Миришкор», «Арғин», «Баҳор», «Чинор» ва «Товкентепа» маҳаллалари (2107,4 гектар) пойтахтнинг Яшнобод туманига, «Геофизика», «Алишеробод», «Чингелди», «Дўстлик», «Тараққиёт», «Баркамол», «Боғишамол», «Ватанпарвар», «Амир Темур», «Мевазор», «Гулбоғ», «Гулзор-1» ва «Пастки-юз» маҳаллалари (2294,6 гектар) Мирзо Улуғбек тумани таркибига ўтказилади.
Белгиланишича, Қибрай тумани округидан сайланган халқ депутатлари Қибрай туман кенгашининг депутатлари тегишлича халқ депутатлари Яшнобод ва Мирзо Улуғбек туман кенгашлари таркибига ўтган ҳисобланади.
Эслатиб ўтамиз, 2020 йилнинг 5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Ўшанда аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган эди. Кейинроқ Улуғбек шаҳарчасининг аҳолиси Тошкент вилояти таркибига, шунингдек, Учтепа тумани яшовчилари учта маҳалла Тошкент вилоятининг Зангиота тумани таркибига ўтказишга қарши чиққанди.
Изоҳ (0)