Сергелидаги хонадонларнинг бирида ёнғин чиқди, ўт яна икки хонадонга ҳам ўтиб кетди, дея хабар бермоқда ФВВ.
Маълум қилинишича, 2021 йилнинг 20 май тонги соат 07:35 да Сергели тумани «Паст Дархон» МФЙ Наврўз 6-тор кўчасида жойлашган хонадонларнинг бирида ёнғин бўлаётгани юзасидан Тошкент шаҳар Фавқулодда вазиятлар бошқармасининг тезкор-қутқарув гуруҳига хабар келиб тушган.
Ёнғин бўйича бирламчи маълумот Фавқулодда вазиятлар вазирлиги матбуот хизмати томонидан интернет тармоқларида тезкорлик (бу вақтда ёнғин фақат бир уйда бўлаётган эди) билан ёритилган.
Ёнғин жойига биринчи бўлинма соат 07:45 да, яъни 10 дақиқада етиб борган, қолган ёнғин-қутқарув бўлинмалари соат 07:47 дан соат 08:24 га қадар, жами 5 та бўлинма ёнғин жойига етиб борган.
Ёнғин содир бўлган хонадон қўшни хонадонларга зич қилиб қурилгани, ёнғинга қарши деворлар бўлмагани, шу билан бирга, шамол тезлиги юқори бўлиб тургани сабаб ёнғин бошқа хонадонларга ҳам тезлик билан тарқалиб, натижада 3 та хонадонга тегишли 200 метр квадрат майдонда ёнғин юзага келган.
Ёнғин-қутқарув бўлинмалари тонгги вақтда пойтахт кўчаларида мавжуд бўлган тирбандликларга дуч келгани, «Паст Дархон» МФЙ, Наврўз 6-тор кўчасидаги ер ости гидрантининг сув босими паст бўлгани каби ҳолатлар ёнғинни тезлик билан бартараф этишга салбий таъсир кўрсатган.
Ёнғин-қутқарув бўлинмалари томонидан амалга оширилган ишлар натижасида, ёнғиндан жабрланган ва ҳалок бўлганлар қайд этилмаган.
Ҳозирда ёнғин сабаблари ва моддий зарар миқдори аниқланмоқда.
Бундан аввал Андижонда машинадан ташлаб юборилган сигарет қолдиғи сабаб ёнғин келиб чиққани, Қўқон шаҳридаги заправкада портлаш ва ёнғин содир бўлгани ҳамда Термиз шаҳридаги мактабларнинг бирида ёнғин чиққани ҳақида хабар берилганди.
Изоҳ (0)