Ўзбекистоннинг Бельгиядаги элчихонаси Европа мамлакатларига чиқишни режалаштираётган ўзбекистонликларни турли фирибгарликлар тузоғига тушиб қолишдан огоҳлантиради, деб хабар бермоқда «Дунё» агентлиги.
Ўзбекистоннинг халқаро ҳаво қатновлари фаоллашиб бораётгани ва карантин чоралари енгиллашаётгани боис Европа мамлакатларига, жумладан, Бельгия ва Нидерландияга ишлаш ва ўқиш мақсадида бораётган Ўзбекистон фуқароларининг сони ортаётгани кузатилмоқда.
Фуқароларнинг аксарияти Болтиқбўйи мамлакатлари, Польша, Руминия ва Украина давлатлари ҳудудидан Бельгия ва Нидерландияга чиқиш учун транзит зонаси сифатида фойдаланишга интилмоқда.
Бу ҳолат Ғарбий Европа мамлакатларига ноқонуний тарзда ишчи кучини жўнатиш билан шуғулланаётган жисмоний ва юридик шахслар фаолияти билан боғлиқ. Бунинг оқибатида Бельгия ва Нидерландияда визасиз ёки ишлаш, яшашга тегишли рухсатномасиз қурилиш, хизмат кўрсатиш, қишлоқ хўжалиги ва бошқа соҳаларда ноқонуний меҳнат қилаётган фуқароларнинг сафи кенгайиб бормоқда.
Ўрганишлар шуни кўрсатмоқдаки, Ўзбекистон фуқаролари аксарият ҳолларда маҳаллий тилда сўзлаша олмаслиги, ҳуқуқий билимсизлиги, ишонувчанлиги ва бошқа сабаблар билан турли фирибгарларнинг тузоғига илиниб қолмоқда.
Айрим фуқаролар билиб-билмай ана шундай фирибгарларнинг алдовига учиши оқибатида пулидан айрилиб, бегона юртларда қийин аҳволга тушиб қолмоқда. Яна ачинарли томони шундаки, ўзбекистонликларнинг ўзга давлат қонунчилигини бузгани учун маъмурий ва жиноий жавобгарликка тортилиш ҳоллари ҳам содир бўлмоқда.
Шу муносабат билан, Ўзбекистоннинг Бельгиядаги элчихонаси Европа давлатларига боришни режалаштираётган мамлакат фуқароларига мурожаат қилди.
«Юқорида қайд этилган мамлакатларда хорижий ва Ўзбекистон фуқаролари томонидан ташкил этилган, ўз фаолиятини ижтимоий тармоқлар орқали ватандошларнинг гуруҳларида реклама қилаётган, хорижга ишга ёки ўқишга жўнатиш ваколатига эга бўлмаган турли уюшган гуруҳларга ишониб қолманг!
Европа мамлакатларига ишга, ўқишга бориш учун қисқа муддатларда расмий хорижий виза ва зарур ҳужжатларни тайёрлаб бериш хизматларини таклиф қилишганда Ташқи меҳнат миграцияси агентлиги (71 202 3355, 71 200 0061 ёки 1282) ва Ўзбекистоннинг хориждаги элчихоналари билан маслаҳатлашинг!
Хорижга вақтинча ёки доимий яшаш, ишлаш ва ўқишга келганингизда элчихонада консуллик рўйхатига туришни унутманг!
Ўзини ўзбекистонликларнинг вакили, ҳимоячиси сифатида кўрсатишга уринаётган, турли ижтимоий тармоқларда нотўғри хабарлар, асоссиз маълумотлар тарқатаётган кимсаларнинг фитналаридан эҳтиёт бўлинг!
2020 йил пандемия даврида элчихона консуллик округида қолиб кетган ватандошларимизга консуллик-ҳуқуқий ва моддий ёрдам кўрсатилди, уларнинг визалари узайтириб берилди, Ўзбекистонга қайтиши учун тўрт марта чартер рейси ташкил қилинди ва мамлакатга кўп маротаба инсонпарварлик ёрдами юборилди.
Бугун дипломатия ваколатхонаси хорижда қийин аҳволга тушиб қолган Ўзбекистон фуқароларига республика ҳукумати томонидан ажратилган маблағлар ҳисобидан моддий-ижтимоий ёрдам кўрсатмоқда.
Европа мамлакатларида ҳуқуқий саводхонлик ва маданиятнинг юқорилиги, қонунлар ва давлат идораларининг самарали фаолият кўрсатишини инобатга олиб, чет элда бўлиб турганингизда турли фирибгар шахсларнинг алдовига тушиб қолган, уларнинг ноқонуний ҳаракатидан жабр кўрган бўлсангиз, хорижий мамлакатлар ҳуқуқни муҳофаза қилиш идораларига ёки элчихонанинг +32 2 661 2042 телефон рақами, consulat@uzbekistan.be электрон почтаси ёки https://t.me/CONSULMFAUZ Telegram тармоғига бевосита мурожаат қилинг!», – деб таъкидланган элчихона мурожаатида.
Ўзбекистон ИИВ жиноятларга қарши курашиш бўлими номидан фойдаланиб, фуқаролардан 240 минг сўм ундирилаётганидан огоҳлантиргани ҳамда ССВ аҳолини сохта табиблардан огоҳлантиргани ҳақида хабар берилганди.
Изоҳ (0)