O‘zbekistonda 96 ming o‘rinli talabalar yotoqxonasini qurish uchun 4,4 trillion so‘m mablag‘ ajratilishi aytildi

O‘zbekiston Oliy va o‘rta maxsus ta’lim vaziri Abduqodir Toshqulov “Toshkent 5 tashabbus harakati” doirasidagi ochiq muloqot chog‘ida 96 ming o‘rinli talabalar yotoqxonasini qurish uchun 4,4 trillion so‘m mablag‘ ajratilishini bildirdi. Bu haqda “Daryo” muxbiri xabar bermoqda.

“Bugungacha 58 ming o‘rinli talabalar turar joylari bor edi, ya’ni ehtiyojning 28 foizi qondirilgan. Ayniqsa, pandemiya davrida talabalar qiynaldi. Muhtaram Prezidentimiz 4,4 trillion so‘m mablag‘ ajratib, 2025-yilgacha 96 ming o‘rinli yotoqxona qurishga topshiriq berdilar”, — deydi vazir.

1-sentabrgacha karavotlarni ikki yarusli qilish hisobiga yana 35 mingta talabalar o‘rinlari tashkil qilinishi ham ta’kidlandi.

Eslatib o‘tamiz, fevral oxirida Toshkentning Yunusobod tumanida besh nafar talaba o‘lik holda topilib, ulardan biri Inha universitetining 1-bosqich talabasi ekani to‘g‘risida xabar berilgan edi. Fojiadan so‘ng ijarada yashayotgan talabalarning sharoitlari o‘rganiladigan bo‘ldi. Bundan tashqari O‘zbekistonda talabalar oilasining betob a’zosini parvarish qilish uchun ham akademik ta’til olishi, Qarshi davlat universiteti hududida talabalar uchun 800 o‘rinli yotoqxona qurilishi hamda Oliy va o‘rta maxsus ta’lim vaziri Abduqodir Toshqulov bir qator rektorlarni tanqid qilgani haqida xabar berilgandi.

Ma’lumot uchun, O‘zbekiston Prezidenti Shavkat Mirziyoyev raisligida 2021-yilning 13-aprel kuni o‘tkazilgan videoselektorda davlat rahbari 1-maydan boshlab talabalarga ijara to‘lovining yarmi davlat tomonidan qoplab berilishi ma’lum qilingandi. Shunga ko‘ra, Prezidentning “Yoshlarning tadbirkorlik faoliyatini qo‘llab-quvvatlash va bandligiga ko‘maklashish, ularni ijtimoiy himoya qilish hamda bo‘sh vaqtini mazmunli tashkil etishga oid qo‘shimcha chora-tadbirlar to‘g‘risida”gi farmoni qabul qilindi.

Hujjatga muvofiq, 2021-yil 1-maydan boshlab yotoqxona bilan qamrab olinmagan va o‘ziga, shu jumladan, ota-onasi (qonuniy vakillari)ga tegishli bo‘lmagan uyda ijara huquqi asosida yashaydigan davlat OTMlari talabalarining 60 foiziga ular tomonidan to‘lanadigan oylik ijara to‘lovining 50 foizi davlat budjeti hisobidan qoplab beriladi.