Германия канцлери Ангела Меркель «Иттифоқ» блоки конференциясидаги нутқи чоғида дунёнинг икки лагерга бўлинишига қарши экани, шу билан бирга АҚШни ўз мамлакатининг асосий иттифоқчиси деб билишини айтди, деб ёзади «РБК».
Фото: Getty Images
«Германия дунёни Совуқ уруш давридаги каби, икки лагерга бўлинишидан манфаатдор эмас. Шу билан бирга, Европанинг асосий иттифоқчиси АҚШнинг Европа Иттифоқи билан биргаликда Россия ва Хитой билан рақобатда иштирок этиши бу яхши», — деди Меркель.
Канцлер АҚШ ва Европа Иттифоқи ўртасида янги савдо шартномаси ғоясини ҳамиша қўллаб-қувватлаб келганини айтди. Шунингдек, у Хитой билан муносабатлар масалаларида мазкур мамлакатда инсон ҳуқуқлари бузилиши масаласини кўтариш кераклигини таъкидлади. Шу билан бирга, Меркель Пекиннинг халқаро тузилмаларда иштирок этиши зарурлигини айтди, чунки бу Европа манфаатларига жавоб беради.
Бир кун олдин АҚШ давлат котиби Энтони Блинкен Лондонда Германия ташқи ишлар вазири Хайко Маас билан учрашув чоғида Вашингтон «Шимолий оқим 2» газ қувури қурилишига «қатъий қарши» эканини эслатиб ўтган эди. Шу билан бирга, АҚШ ташқи ишлар вазири «Россия, Хитой ва Эроннинг беқарорлаштирувчи фаолияти» қаршисида трансатлантик шерикликнинг муҳим эканини таъкидлади.
Германия, ўз навбатида, АҚШнинг янги санкциялар эълон қилиниши билан боғлиқ ҳаракатларини бир неча бор салбий баҳолаган. 2021 йил январда Меркель уларни аҳамиятсиз ташқи сиёсий восита деб атаган эди. Шунингдек, у АҚШнинг ўша пайтдаги маъмуриятининг ўзгариши Вашингтон ва Берлин ўртасида янада конструктив алоқаларга олиб келишига умид билдирган.
Аввалроқ Ангела Меркель Россия президенти Владимир Путин билан шахсий суҳбатлар чоғида уни очиқчасига танқид қилиши ва баъзи масалаларда у билан ҳамфикр эмаслигини маълум қилган. Шунингдек, Байден ва Ангела Меркель Россияни Украина билан чегарадаги қўшинларини олиб кетишга чақирган эди
