Rossiya prezidenti Vladimir Putin Germaniya kansleri Angela Merkel va Fransiya prezidenti Emmanuel Makron bilan videokonferensaloqa orqali muzokaralar o‘tkazdi. Bu haqda Kremlning ma’lumotiga tayanib, Meduza xabar berdi.
Foto: Reuters
Makron matbuot xizmatida aytilishicha, Germaniya va Fransiya rahbarlari Putinning e’tiborini Rossiya muxolifati rahbari Aleksey Navalniyning huquqlarini hurmat qilish va “sog‘lig‘ini asrash” zarurligiga qaratgan. “Ularga Navalniy ishining obyektiv holatlari to‘g‘risida tegishli tushuntirishlar berildi”, — deyiladi Kreml veb-saytida.
Shuningdek, Putin, Merkel va Makron koronavirusga qarshi Rossiyaning “Sputnik V” vaksinasini Yevropa Ittifoqida ro‘yxatdan o‘tkazish ushbu preparatni Yevroittifoq mamlakatlarida hamkorlikda ishlab chiqarish va yetkazib berish istiqbollarini muhokama qildi.
Bundan tashqari, uch mamlakat rahbarlari Ukraina, Belarus, Liviya va Suriyadagi vaziyatlar haqida suhbatlashdi. “Umuman olganda, muzokaralar amaliy va samimiy muhitda o‘tdi, kun tartibidagi barcha dolzarb hamkorlik ishlarini davom ettirishga kelishib olindi”, — deyiladi Kreml bayonotida.
Eslatib o‘tamiz, ayni paytda Navalniy Rossiyaning Vladimir viloyatidagi 2-sonli axloq tuzatish koloniyasida jazo o‘tamoqda. Avvalroq Navalniyning advokatlari koloniyada siyosatchining sog‘lig‘i yomonlashib, yelkasi, so‘ng oyog‘i og‘rib qolgani, ammo unga kerakli tibbiy yordam ko‘rsatilmagani haqida xabar bergan. Federal jazoni ijro etish xizmati, o‘z navbatida, Navalniyning ahvolini “barqaror va qoniqarli deb baholaganini” ma’lum qilgan.
Navalniy, shuningdek, tergov hibsxonasidagi kabi bu yerda ham “qochishga moyil” maqomini olgani, tunda og‘riqlardan har soatda uyg‘onishini ta’kidlagan.
Ma’lumot uchun, 4-mart kuni Yevropa dori-darmon agentligi (EMA) “Sputnik V” vaksinasini Yevroittifoq hududida foydalanish uchun baholashni boshladi. 24-mart kuni Germaniya EMA tasdig‘ini kutmasdan “Sputnik V” vaksinasini sotib olishni boshlash uchun muzokaralarga chaqirdi. Ammo Yevroittifoqda Rossiya vaksinasidan foydalanish maqsadga muvofiqligi to‘g‘risida yakdil fikr mavjud emas. Putinning ta’kidlashicha, Rossiya Yevroittifoqni vaksinasidan foydalanishga “majburlamaydi”.
