Merkel Putinni shaxsiy suhbatlardagina ochiqchasiga tanqid qilishini aytdi
Germaniya kansleri Angela Merkel Rossiya prezidenti Vladimir Putin bilan shaxsiy suhbatlar chog‘ida uni ochiqchasiga tanqid qilishi va ba’zi masalalarda u bilan hamfikr emasligini ma’lum qildi. Bu haqda “TASS” xabar berdi.
20-aprel kuni Yevropa Kengashi Parlament assambleyasining bahorgi sessiyasi ishtirokchilariga videoaloqa orqali murojaati va ishtirokchilardan birining siz ham Putinni ‘qotil’ deb bilasizmi, degan savoliga javob berar ekan Merkel shunday dedi:
“Vladimir Putinga kelsak, u haqda o‘z so‘zlarim bilan javob beraman: Putinni tanqid qilishimni yashirmayman, ammo faqatgina shaxsiy suhbatlar mobaynida tanqid qilaman”.
Merkel “men Rossiyada yuz berayotgan voqealarning hammasiga ham tarafdorlik qilmayman ” deya ta’kidlab, avvalambor, inson huquqlariga rioya qilish muammosiga ishora qildi. “Men Navalniy mavzusini allaqachon aytib o‘tgan edim, ammo yana ko‘plab mavzularni ham sanab o‘tishim mumkin”, — deya qo‘shimcha qildi u.
Shu bilan birga, Merkel barcha tafovutlarga qaramay Rossiya bilan muloqot muhim ekanini ta’kidladi.
Aprel oyi boshida Putin va Angela Merkel telefon orqali suhbatlashgan edi. Suhbat chog‘ida tomonlar Navalniy masalasini muhokama qildi. Germaniya kansleri Rossiya qo‘shinlarining bir qismini Ukraina chegarasidan olib ketishga chaqirdi. Undan avval Angela Merkel va Fransiya prezidenti Emmanuel Makron Putin bilan videokonferensaloqa orqali muzokaralar o‘tkazdi. Ular Putindan Navalniyning “sog‘lig‘ini asrash”ni iltimos qildi.16-aprel kuni Makron, Angela Merkel va Ukraina prezidenti Vladimir Zelenskiy uch tomonlama uchrashuv yakunida Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.
Bungacha ham Bayden va Merkel Rossiyani Ukraina bilan chegaradagi qo‘shinlarini olib ketishga chaqirgan.
