АҚШ қитъалараро ракета синови муваффақиятсиз кечганини маълум қилди

АҚШ Ҳаво кучларининг глобал зарба қўмондонлиги Минутеман III қитъалараро баллистик ракетанинг синови муваффақиятсиз ўтганини маълум қилди. Бу ҳақда ҳарбий тузилма Twitter’ига таяниб, «РБК» хабар берди.

Хабарга кўра, машғулотлар доирасида жанговар каллакcиз ракетани Калифорниядаги Ванденберг базасидан учириш режалаштирилган эди. Ишга туширгич билан боғлиқ муаммолар туфайли синовлар муваффақиятсиз тугаган.

Ҳарбийлар бунинг сабабларини текширмоқда. Шу билан бирга, глобал зарба қўмондонлиги машғулотни бошқа санага қолдиришга рухсат берди.

Пентагон ўз навбатида, машғулотларнинг вазифаси тизим самарадорлигини синаб кўриш эканини таъкидлади.

Маълумот учун, 1970 йилда яратилган Минутеман III фақат шахтадан ишга туширилади. 40 йил давомида у бир неча бор модернизация қилинди. Шу билан бирга, вақти-вақти билан Пентагон ракета учирилиши муваффақиятсиз тугагани ҳақида хабар бериб турди.

Апрель ойи охирида АҚШ Мудофаа вазирлиги стратегик қўмондонлиги раҳбари адмирал Чарльз Ричард эскирган Минутеман III билан қуролланган мамлакат учун Россия ва Хитойга қаршилик кўрсатиш қийинлигини айтди.

Унинг сўзларига кўра, ракеталарни доимий модернезация қилиш мумкин эмас ва 1970 йилги қуролларни «2030 йил даражасидаги таҳдидларга қарши» ишлатиш самарасиз. Бундан ташқари, айрим таркибий қисмлар шу қадар эскирганки, зарурат туғилганда, мамлакатда уларни ишлаб чиқарадиган биронта ҳам корхона қолмаган.

Аввалроқ АҚШ ҳарбий ҳаво кучларининг AGM-183A ARRW гипертовушли ракетаси синовлари муваффақиятсиз тугагани маълум қилинганди. Ракета Boeing B-52 Stratofortress бомбардимончи самолётидан учирилиши керак эди. «Бироқ ракета учиш тартибини якунлай олмади ва самолётда қолиб кетди. Самолёт ракета билан Калифорниядаги Эдвардс авиабазасига қайтиб келди», — дейилади АҚШ ҳарбий ҳаво кучлари баёнотида.