Germaniya kansleri Angela Merkel “Ittifoq” bloki konferensiyasidagi nutqi chog‘ida dunyoning ikki lagerga bo‘linishiga qarshi ekani, shu bilan birga AQShni o‘z mamlakatining asosiy ittifoqchisi deb bilishini aytdi, deb yozadi “RBK”.
“Germaniya dunyoni Sovuq urush davridagi kabi, ikki lagerga bo‘linishidan manfaatdor emas. Shu bilan birga, Yevropaning asosiy ittifoqchisi AQShning Yevropa Ittifoqi bilan birgalikda Rossiya va Xitoy bilan raqobatda ishtirok etishi bu yaxshi”, — dedi Merkel.
Kansler AQSh va Yevropa Ittifoqi o‘rtasida yangi savdo shartnomasi g‘oyasini hamisha qo‘llab-quvvatlab kelganini aytdi. Shuningdek, u Xitoy bilan munosabatlar masalalarida mazkur mamlakatda inson huquqlari buzilishi masalasini ko‘tarish kerakligini ta’kidladi. Shu bilan birga, Merkel Pekinning xalqaro tuzilmalarda ishtirok etishi zarurligini aytdi, chunki bu Yevropa manfaatlariga javob beradi.
Bir kun oldin AQSh davlat kotibi Entoni Blinken Londonda Germaniya tashqi ishlar vaziri Xayko Maas bilan uchrashuv chog‘ida Vashington “Shimoliy oqim 2” gaz quvuri qurilishiga “qat’iy qarshi” ekanini eslatib o‘tgan edi. Shu bilan birga, AQSh tashqi ishlar vaziri “Rossiya, Xitoy va Eronning beqarorlashtiruvchi faoliyati” qarshisida transatlantik sheriklikning muhim ekanini ta’kidladi.
Germaniya, o‘z navbatida, AQShning yangi sanksiyalar e’lon qilinishi bilan bog‘liq harakatlarini bir necha bor salbiy baholagan. 2021-yil yanvarda Merkel ularni ahamiyatsiz tashqi siyosiy vosita deb atagan edi. Shuningdek, u AQShning o‘sha paytdagi ma’muriyatining o‘zgarishi Vashington va Berlin o‘rtasida yanada konstruktiv aloqalarga olib kelishiga umid bildirgan.
Avvalroq Angela Merkel Rossiya prezidenti Vladimir Putin bilan shaxsiy suhbatlar chog‘ida uni ochiqchasiga tanqid qilishi va ba’zi masalalarda u bilan hamfikr emasligini ma’lum qilgan. Shuningdek, Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirgan edi
Izoh (0)