АҚШнинг 45-президенти Дональд Трамп donaldjtrump.com веб-сайтини ишга туширди. Сайтда у хабарлар ёзиши, расм ва видеолар жойлаштириши мумкин. Бу ҳақда Meduza хабар берди.
Сайтнинг «From the Desk of Donald J. Trump» («Дональд Трамп столидан») бўлимида Трамп номидан бир нечта қисқа хабарлар чоп этилди. Улардан биринчиси 13 апрелда ёзилган, аммо платформа фақат 4 май куни кенг жамоатчиликка маълум бўлди.
Фойдаланувчилар Трампнинг постларини Twitter ва Facebook’да улашиши мумкин, аммо хабарларга жавоб бера олмайди. «Бу шунчаки бир томонлама алоқа. Тизим Трампга ўз тарафдорлари билан мулоқот ўрнатишга имкон беради», — деди Fox News телеканалига платформадан хабардор манба.
Март ойи охирида Трамп ўз тарафдорлари билан мулоқот қилиш мақсадида ўзининг «45office.com» шахсий сайтини ишга туширган эди. Сайтда тарафдорлар билан очиқ-ойдин ёзишмалар олиб бориш имконияти мавжуд эмас.
Эслатиб ўтамиз, Дональд Трампни қўллаб-қувватловчилар томонидан ташкил этилган «Американи қутқариш марши» номли норозилик намойиши иштирокчилари 2021 йил 6 январь куни пойтахт Вашингтондаги Капитолий биносига бостириб кирган.
Натижада январь ойининг бошида Facebook ва Instagram Дональд Трампнинг аккаунтини президентлик муддати тугагунча блоклади. Twitter эса Трампнинг шахсий аккаунтини «кейинчалик зўравонликка даъват этишнинг юқори хавфига боғлиқлиги сабаб» бутунлай блоклади.
Кейинроқ Трампнинг маслаҳатчиси Жейсон Миллер Fox News телеканали эфирида АҚШнинг собиқ президенти икки-уч ой ичида «ўз платформаси билан» ижтимоий тармоқларга қайтишини айтди.