14 апрелдан бошлаб Ўзбекистон фуқаролари Россияга доимий рейсларда нафақат Ўзбекистондан, балки доимий рейслар тикланган бошқа мамлакатлардан ҳам учишлари мумкин. Бу ҳақда Россиянинг Ўзбекистондаги консуллиги хабар берди.
Таъкидланишича, Россия ҳукуматининг 2020 йил 16 мартдаги №635-р сонли буйруғининг биринчи иловасига ўзгартириш киритилган.
Рўйхатда Ўзбекистондан ташқари, Қирғизистон, Қозоғистон, БАА, Миср, Япония, Жанубий Корея каби 27 та давлат ўрин олган. Ўзбекистон фуқароларига Россияга кириш учун бирор асос кўрсатиши шарт эмас. Яъни Ўзбекистоннинг ўзидан учиб бориши талаб этилмайди.
Таъкидлаш керакки, 2021 йилнинг 15 апрелидан 1 июнига қадар Россия Туркия билан алоҳида рейслардан ташқари авиақатновларни вақтинча тўхтатган.
Ҳужжат 14 апрелда қабул қилинган бўлса-да, 20 апрель куни расман эълон қилинган.
Аввалроқ Россия 1 апрелдан Ўзбекистон билан мунтазам авиақатновларни тиклаши тўғрисида хабар берилганди. Россиянинг Ўзбекистондаги элчихонаси консуллик бўлими биринчи босқичда фақат битта — ҳафтасига бир марта Москва—Тошкент йўналиши амалга оширилишини маълум қилганди. Ушбу хабардан сўнг Россияга учувчи самолёт чипталарига талаб 165 фоизга ўсганди.
Изоҳ (0)