Ўзбекистон ташқи савдо айланмаси январь—март ойларида 930 млн долларга камайди

Ўзбекистоннинг ташқи савдо айланмаси 2021 йил январь—март ойлари якунлари бўйича 7,1 миллиард долларни ташкил этиб, 2020 йилнинг шу даврига нисбатан 930 миллион долларга ёки 11,6 фоизга камайди. Бу ҳақда Давлат статистика қўмитаси ҳисоботида қайд этилган.

Экспорт 2,4 миллиард долларни (26,5 фоизга камайган), импорт эса 4,7 миллиард долларни (1,3 фоизга камайган) ташкил этган. Ҳисобот даврида 2,3 миллиард доллар қийматида пассив ташқи савдо баланси қайд этилган.

Бу вақт давомида ташқи савдо айланмасининг нисбатан салмоқли ҳиссаси Хитой (1,4 миллиард доллар), Россия (1,3 миллиард доллар), Қозоғистон (866,7 миллион доллар), Туркия (653,3 миллион доллар), Жанубий Корея (408,3 миллион доллар) ва Қирғизистон (187,9 миллион доллар) давлатларига тўғри келган.

Экспорт таркибида етакчи ўринни саноат товарлари эгаллади — 38 фоиз. Ундан кейинги ўринларни озиқ-овқат маҳсулотлари ва тирик ҳайвонлар (9,5 фоиз), кимёвий моддалар ва тоифаларга киритилмаган шунга ўхшаш маҳсулотлар (9,5 фоиз) эгаллади.

«Gazeta.uz» экспорт ҳажмининг сезиларли пасайишига Ўзбекистон 7 ойдан бери олтин экспорт қилмаётганини сабаб қилиб кўрсатган. Спот буни ноодатий ҳолат деб баҳолаган, чунки олтин республиканинг бир неча йиллардан буён асосий экспорти бўлиб келган. Баъзан унга экспортнинг 50 фоизи ва ундан ортиғи тўғри келган.

Импорт ҳажми 4,7 миллиард долларни ва 2020 йилга нисбатан 98,7 фоизни ташкил этди. Импорт таркибида энг катта улуш машиналар ва транспорт асбоб-ускуналари (29,5 фоиз), саноат товарлари (18,7 фоиз) ҳамда кимёвий воситалар ва бошқа тоифаларга киритилмаган шунга ўхшаш маҳсулотлар (14,3 фоиз) ҳисобига тўғри келди.