Болалар омбдусмани Қашқадарёда жойлашган 5-меҳрибонлик уйидаги шароитларни танқид қилганидан сўнг ушбу меҳрибонлик уйи директори ишдан олиниб, бир қатор масъуллар жавобгарликка тортилганди. Китоб туман ҳокимияти матбуот хизмати 2020 йилнинг февралидаёқ халқ таълими вазири Шерзод Шерматов мазкур муассасани ёпиш таклифи билан чиққанини маълум қилди.
Қайд этилишича, 20 апрель куни вилоят ҳокимлиги, вилоят прокуратураси, халқ таълими, молия, ИИБ, СЭО ва ЖСХ, бандлик бош бошқармалари масъулларидан иборат ишчи гуруҳи тузилган бўлиб, улар томонидан муассасада яратилган шарт-шароитларни ўрганиш юзасидан текширув ўтказилмоқда.
Ўрганишлар давомида аниқланишича, халқ таълими вазирининг 2020 йил 14 февралдаги хатида мехрибонлик уйларида ота-онаси бор кам таъминланган оила фарзандларини жойлаштириш ортиб кетганлиги сабабли ижтимоий аҳволи яхшиланган оила фарзандларини қайтариш орқали Китоб туманидаги 5-сонли меҳрибонлик уйи фаолиятини тугатиб, тарбияланувчиларни Қамаши туманидаги 4-сонли меҳрибонлик уйига ўтказиш ва 4-сонли меҳрибонлик уйини Қамаши Болалар шаҳарчасига айлантириш таклифи билдирилган.
«Бироқ республика ҳудудида коронавирус инфекциясига қарши кучайтирилган тартиб жорий этилганлиги боис 5-сонли меҳрибонлик уйининг фаолиятини тугатиш билан боғлиқ ишлар охирига етказилмаган», — дейилади хабарда.
Ўрганишлар давомида, шунингдек, муассасада 65 нафар тарбияланувчи бўлса-да, 75 нафар ходим фаолият кўрсатиб келаётгани, шундан 10 нафар тарбиячи вазифасига номутахассислар ишга қабул қилингани, тарбияланувчиларнинг 15 нафари чин етим ҳисобланиши, 50 нафарининг ота-онаси ёки улардан бири ҳаёт эканлиги аниқланган.
Айни пайтда ўрганиш ишлари давом этаётгани таъкидланган. Вилоят прокуратураси ҳозирда меҳрибонлик уйи тарбияланувчилари учун муносиб шарт-шароитлар яратишга аҳамият берилаётганини маълум қилган.
Изоҳ (0)