Moskvaga ishlash uchun borgan 500 dan ortiq o‘zbekistonlik 2 oydan buyon karantindaligi sabab norozilik bildirdi
O‘zbekiston Tashqi mehnat migratsiyasi agentligi Moskvada norozilik bildirib, ish joyi hovlisiga chiqqan 500 dan o‘zbekistonlikka oid vaziyat yuzasidan bayonot berdi.
19-aprel kuni Facebook ijtimoiy tarmog‘ida Moskva shahrida 500 nafardan ortiq o‘zbekistonlik muhojir norozilik bildirib, ish joyi hovlisiga chiqqani, ular jonli efir vaqtida migrantlar muammosiga O‘zbekiston mas’ullari, o‘zbek va rus OAVlari e’tibor berishini xohlayotgani tasvirlangan video tarqalgan edi.
Videoda qayd etilishicha, 500 nafardan ortiq muhojir Rossiyaga O‘zbekistonning Tashqi mehnat migratsiyasi agentligi tarafidan rasmiy ravishda olib kelingan. Davlat tarafidan Rossiyaning “ANTEK” qurilish tashkilotiga ishlashga kelgan muhojirlarga ish beruvchi bilet olib bergan. Yotoqxonaga joylashtirilgan muhojirlarning so‘zlariga ko‘ra, ular uch oydan buyon yotoqxonadan hech qayerga chiqa olmayapti.
Rossiyaning “ANTEK” qurilish kompaniyasida vaqtinchalik mehnat faoliyatini amalga oshirish uchun jalb qilingan O‘zbekiston fuqarolari bilan bog‘liq holatni o‘rganish maqsadida Tashqi mehnat migratsiyasi agentligining Moskva shahridagi vakolatxonasi rahbari S.Mansurov, O‘zbekiston Rossiyadagi elchixonasi maslahatchisi A.Ziyamuhamedov voqea joyiga borgan, fuqarolar va mas’ul shaxslar bilan uchrashib, ularning yashash va ishlash sharoitlari bilan tanishgan.
O‘rganish jarayonida quyidagilar ma’lum bo‘lgan:
- fuqarolarning karantin sharoitida bo‘lish davri cho‘zilib ketgan. Rossiya iste’molchilar huquqlarini himoya qilish va inson farovonligini nazorat qilish bo‘yicha federal xizmati (“Rospotrebnadzor”) tomonidan o‘tkazilgan tekshirishlar natijasida ayrim fuqarolarda koronavirus infeksiyasi aniqlangani sababli ular ikki oyga yaqin vaqt davomida karantin hududida bo‘lib turibdi;
- ish beruvchi tashkilotlar xodimlari tomonidan ishchilarning shaxsini tasdiqlovchi hujjatlari olib qo‘yilgan.
Shuningdek, fuqarolar uchun ovqat tashkil etish bilan bog‘liq hamda yotoqxona xavfsizligi xodimlari bilan muammolar yuzaga kelgan.
“Ayni paytda ushbu vaziyat nazoratga olingan bo‘lib, yuqoridagi muammolarni bartaraf etish, xususan, pasportlarni fuqarolarga qaytarish, qurilish obyektlarida ish boshlash jarayonini tezlashtirish, ularning yashash va ishlash sharoitlarini yaxshilash bo‘yicha ‘ANTEK’ MChJ rahbariyati bilan muzokaralar olib borilmoqda”, — deyiladi rasmiy bayonotda.
Avvalroq Rossiyaga qurilish sohasida ishlashga kelgan mehnat muhojirlarining uchdan bir qismi kuryerlikka o‘tib ketishi, O‘zbekistonda yil boshidan buyon 10 mingga yaqin kishi ishlash uchun xorijga chiqib ketgani to‘g‘risida xabar berilgandi.
