14-apreldan boshlab O‘zbekiston fuqarolari Rossiyaga doimiy reyslarda nafaqat O‘zbekistondan, balki doimiy reyslar tiklangan boshqa mamlakatlardan ham uchishlari mumkin. Bu haqda Rossiyaning O‘zbekistondagi konsulligi xabar berdi.
Ta’kidlanishicha, Rossiya hukumatining 2020-yil 16-martdagi №635-r sonli buyrug‘ining birinchi ilovasiga o‘zgartirish kiritilgan.
Ro‘yxatda O‘zbekistondan tashqari, Qirg‘iziston, Qozog‘iston, BAA, Misr, Yaponiya, Janubiy Koreya kabi 27 ta davlat o‘rin olgan. O‘zbekiston fuqarolariga Rossiyaga kirish uchun biror asos ko‘rsatishi shart emas. Ya’ni O‘zbekistonning o‘zidan uchib borishi talab etilmaydi.
Ta’kidlash kerakki, 2021-yilning 15-aprelidan 1-iyuniga qadar Rossiya Turkiya bilan alohida reyslardan tashqari aviaqatnovlarni vaqtincha to‘xtatgan.
Hujjat 14-aprelda qabul qilingan bo‘lsa-da, 20-aprel kuni rasman e’lon qilingan.
Avvalroq Rossiya 1-apreldan O‘zbekiston bilan muntazam aviaqatnovlarni tiklashi to‘g‘risida xabar berilgandi. Rossiyaning O‘zbekistondagi elchixonasi konsullik bo‘limi birinchi bosqichda faqat bitta — haftasiga bir marta Moskva—Toshkent yo‘nalishi amalga oshirilishini ma’lum qilgandi. Ushbu xabardan so‘ng Rossiyaga uchuvchi samolyot chiptalariga talab 165 foizga o‘sgandi.
Mavzuga doir:
Izoh (0)