Самарқанд шаҳридаги 31 та мактабда коронавирусга чалиниш ҳолатлари аниқланди, дея хабар бермоқда «Халқ сўзи Online».
Самарқанд шаҳридаги 31 та умумий ўрта таълим мактабининг ўқитувчи ва ўқувчилари орасида коронавирус инфекциясини юқтириш ҳолатлари аниқлангани сабабли ушбу мактабларда 14 кунга ўқув жараёни масофавий шаклга ўтказилган.
Шунингдек, 21 апрель куни ҳам 1, 19, 41 ва 47-мактаб ўқувчилари орасида касаллик юқтириш ҳолати аниқланди ва бу мактабларда ҳам ўқиш онлайн тартибда олиб бориладиган бўлди.
Маълумот учун, айни пайтда шаҳардаги 35 та мактабда таълим жараёни масофавий тарзда олиб бориляпти. Ушбу мактабларнинг ўқитувчи ва ўқувчиларидан олинадиган тиббий тест натижаларига қараб ўқишлар анъанавий шаклга ўтказилиши мумкин.
Бундан аввал Тошкент давлат шарқшунослик университети, Жисмоний тарбия ва спорт университети ва Жаҳон тиллари университети ҳамда унинг академик лицейида ҳам ўқув жараёнлари онлайн шаклга ўтказилгани ҳақида хабар берилган эди. Жаҳон иқтисодиёти ва дипломатия университетида ўқув жараёнлари 19 апрелдан, Самарқанд иқтисодиёт ва сервис институтида эса 20 апрелдан 14 кунга масофавий шаклга ўтказилганди.
Шунингдек, Алишер Навоий номидаги Тошкент давлат ўзбек тили ва адабиёти университетида профессор-ўқитувчилари, талабалари орасида коронавирусга чалиниш ҳолати аниқлангани сабаб дарслар 19 апрелдан онлайн шаклга ўтказилгани ҳақида хабар берилди. Ўзбекистон журналистика ва оммавий коммуникациялар университетида ҳам дарслар 12 апрелдан бошлаб икки ҳафтага онлайн шаклга ўтказилди.
Бундан ташқари, Ўзбекистон давлат консерваториясининг 4 нафар ўқитувчи ва 1 нафар талабасида коронавирус аниқланиб, ОТМ масофавий таълимга ўтганди. 25 март куни Тошкент молия институти ва Тошкент транспорт университети талабаларида ҳам коронавирус аниқлангани сабаб факультет талабалари масофавий шаклга ўтказилганди.
Изоҳ (0)