ИШИД террорчилик ташкилотининг ҳозирги етакчиси Амир Муҳаммад Саид Абдул-Раҳмон ал-Маул аввал Ироқдаги америкалик ҳарбийларнинг информатори бўлган. Уэс-Пойнтдаги Террорчиликка қарши кураш бўйича марказ ошкор қилган ал-Маулнинг сўроқ баённомаларида бу ҳақда маълумотлар мавжуд, деб ёзмоқда The Washington Post.
Абу Иброҳим ал-Хошимий ал-Қурайший номи билан танилган Амир Муҳаммад Саид Абдул-Раҳмон ал-Маул 2019 йил октябрь ойида ИШИД раҳнамоси деб эълон қилинганди. Ўшанда у ташкилотнинг собиқ раҳбари Абу-Бакр ал-Бағдодий Суриядаги АҚШ махсус операцияси вақтида ўзини портлатиб юборганидан кейин ИШИД етакчисига айланганди. АҚШ ал-Маулни қидирувга берган ва уни топган одамга 10 миллион долларгача мукофот ваъда қилган.
АҚШ ҳарбий академиясининг террорчиликка қарши курашиш бўйича маркази ал-Маулнинг америкалик ҳарбийлар билан ҳамкорлик қилгани ҳақидаги ахборотларни 2020 йилнинг кузида ошкор этганди. Бироқ The Washington Post’нинг ёзишича, янги маълумотлар бирмунча сабрсиз инсон бўлган ИШИДнинг ҳозирги етакчиси берган ахборот ҳарбийларнинг ташкилотга янада яқинлашишига замин ҳозирлаган.
Ал-Маул 2007 йил охири ёки 2008 йил бошларида Ироқда қўлга олинган ва у вақтда ИШИДнинг ўрта гуруҳига қўмондонлик қилган. У махсус лагерга жойлаштирилган ва АҚШ ҳарбийлари уни жуда кўп марта сўроқ қилган. Ал-Маул қарийб икки ой давомида ҳарбийлар билан ҳамкорлик алоқаларини олиб борган. Уни сўроқ қилиш бўйича охирги баённомалар 2008 йил июнида қайд этилган. Шундан кейин унинг қаерга кетганига аниқлик киритилмаган. Ал-Маул озодликка чиқарилгани тахмин қилинган.
Ал-Маул АҚШ ҳарбийларига террорчиликда гумон қилинган шахслар фотороботини яратишга кўмаклашган ва ИШИДдаги раҳнамолари тушлик қилган ресторанлар ҳақида гапириб берган. Сўроқларнинг бирида у 19 нафар ИШИД қўмондонининг телефон рақамларини айтган ва уларнинг айримлари қанча пул ишлаб топиши ҳақида ҳам маълумот берган. Бошқа бир сўроқ жараёнида ИШИД асосчиларидан бири, «Ал-Қоида» террорчилик ташкилоти аъзоси Муҳаммад Муму яширинган жой қаерда эканлигини ошкор қилган. Кейинчалик Муму отиб ўлдирилган.
«Ал-Маул ёрқин иқтидор ва қобилиятлар соҳиби эди», — дея ёзган АҚШ ҳарбий академияси Террорчиликка қарши курашиш маркази доценти Дэниэл Милтон Lawfare’даги блогида. Милтон ал-Маулнинг сўроқ баённомаларини ўрганган тадқиқотчилардан бири ҳисобланади.
Ал-Маул ҳақидаги ҳужжатларни ошкор этган расмий шахслар ахборотларнинг ИШИД етакчисини шарманда қилиши мумкинлигини яхши тушунади, бироқ ташкилот ичкарисида ал-Маулнинг ўтмиши ҳақида маълумотга эга террорчилар кўп. ИШИД аъзоларининг ҳаммаси ҳам унинг тарафдори эмас, айримлар уни АҚШ билан ҳамкорлик қилгани учун ҳам ИШИД раҳбарлигига тайинланишига қарши чиққан. Лекин АҚШ ҳукуматининг маълум қилишича, ал-Маул барибир инсоният учун жиддий хавф туғдираётган террорчилардан бири, дея ёзган The Washington Post.
Аввал Ироқ қуролли кучлари ИШИД етакчиларидан бири — «Дажла амири»ни қўлга олгани ҳақида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)