Россия «Ю.А.Гагарин» кемаси ортилган ракетани учирди (фото ва видео)

«Союз-2.1а» элтувчи ракетаси «Ю.А.Гагарин» «Союз МС-18» бошқарилувчи кемаси билан бирга Бойқўнғир космодромидан учирилди, деб хабар беради «РБК».

Космонавтика куни ва инсоннинг коинотга илк парвозига 60 йил тўлишига бағишлаб учирилган кема бортида россиялик космонавтлар Олег Новицкий, Пётр Дубров ва NASA астронавти Марк Ванде Хай бор.

Экспедиция 191 сутка давом этади. Режа бўйича космонавтлар янги «Наука» кўп функцияли лаборатория модулини қабул қилиб олиш учун 50 га яқин илмий экспериментларни амалга ошириши ва икки марта очиқ коинотга чиқиши керак.

«Роскосмос» маълум қилишича, стартдан кейин элтувчи ракетанинг биринчи ва иккинчи поғоналари бош қисмидаги обтекател (суйри деталь) табақалари билан бирга муваффақиятли ажралиб чиқди, сўнг кема Ерга яқин орбитага чиқиб олди.

https://twitter.com/roscosmos/status/1380424713290321925

Тошкент вақти билан 16:07 да «Союз МС-18» Халқаро коинот станциясига етиб бориши керак, айни пайтда станцияда «Роскосмос» космонавтлари Сергей Рижиков ва Сергей Куд-Сверчков, шунингдек, NASA астронавтлари Кетлин Рубинс, Майкл Ҳопкинс, Виктор Гловер, Шеннон Уокер ва JАХА (Япония аэрокосмик тадқиқот агентлиги) астронавти Соиги Ногучи бор.

Элтувчи ракета Бойқўнғир космодромидаги старт майдончасига 6 апрель куни ўрнатилган эди. Тарихий воқеага 60 йил тўлиши муносабати билан ракета корпусига Юрий Гагариннинг исм-шарифи ва унинг портрети туширилган.

Март ойида «Роскосмос» «Союз-2.1а» элтувчи ракетасининг янги дизайнини тақдим этган эди. Ўшанда у тарихда биринчи марта янгича рангларга бўялиб, «Союз» ракеталарининг анъанавий кул ранг-тўқ сариқ туси — оқ-кўк рангга ўзгартирилади. Давлат корпорациясида қайд этишларича, дизайн Юрий Гагарин коинотга биринчи парвозни амалга оширган «Восток» элтувчи ракетасининг Халқ хўжалиги ютуқлари кўргазмасида турган прототипидан илҳомланган ҳолда яратилган.