Путин ва Меркель Донбасс ва Навальнийни муҳокама қилди. Германия канцлери Россия қўшинларининг бир қисмини Украина чегарасидан олиб кетишга чақирди

Россия президенти Владимир Путин Германия канцлери Ангела Меркель билан телефон орқали суҳбатлашди, деб ёзади Meduza.

Мулоқот чоғида томонлар бошқа масалалар билан бир қаторда, Украина жануби-шарқида кескинликнинг кучайиши юзасидан хавотир билдирди.

«Владимир Путин сўнгги вақтларда чегара чизиғида вазиятни атайлабдан кескинлаштираётган Киевнинг провокацион хатти-ҳаракатларига эътибор қаратди. Киев ҳукумати аввало Донецк ва Луганск билан тўғридан-тўғри музокараларни йўлга қўйиш бўйича ҳамда Донбасснинг алоҳида мақомини қонуний расмийлаштириш бўйича аввалроқ эришилган келишувларга оғишмай амал қилиши зарурлиги таъкидланди», — дейилади Россия президенти матбуот хизмати хабарида.

Кейинроқ Германия ҳукумати Путин ва Меркель Россиянинг Украина чегаралари яқинида «кучайган ҳарбий иштироки»ни муҳокама қилгани ҳақида хабар берди. Германия канцлери бу қўшимча кучларни чегарадан олиб кетишга чақирди.

Шунингдек, «канцлер томонидан билдирилган қизиқиш туфайли», суҳбат чоғида «Навальний билан боғлиқ вазият» ҳам тилга олинди, дейилади Кремль хабарида. Аввалроқ президент матбуот котиби Дмитрий Песков Путин «бир неча ҳафта олдин» Навальний масаласини халқаро телефон суҳбатлари чоғида муҳокама қилган бўлса-да, Кремль у билан боғлиқ вазиятни кузатмаётганини айтган эди.

Эслатиб ўтамиз, Россия қўшинларининг Донбассга тортилиши фонида Украина НАТОга қўшилиш масаласини қайта кўтарди. НАТО бош котиби Йенс Столтенберг билан суҳбатда Зеленский НАТО Донбассдаги урушни тўхтатишнинг ягона йўли эканини айтди. АҚШ бу ғояни ҳозирча назарий жиҳатдан қўллаб-қувватламоқда, Кремлнинг фикрича, Украинанинг НАТОга аъзо бўлиши Донбассдаги инқирозни янада кучайтиради.

Март ойи охирида The New York Times газетаси 4 минг рус қўшини Украина чегараларига, хусусан, Ростов, Брянск, Воронеж вилоятлари ва Қримга юборилгани ҳақида хабар берди. Ҳаммаси бўлиб, Россия Қуролли Кучларининг 28 та тактик баталён гуруҳи чегаралар бўйлаб жойлаштирилган. АҚШ расмийлари Россиядан нима сабабдан ўзининг жануби-ғарбий чегараларига қўшин жойлаштиргани ҳақида изоҳ талаб қилди. Қўшма Штатлар буни Украинага қарши провокация деб ҳисобламоқда.