Туркияда пандемия бошидан буён бир кеча-кундузда COVID-19’га чалинганлар сони рекорд даражага етди, деб ёзади «Интерфакс» мамлакат Соғлиқни сақлаш вазирлигига таяниб.
Ўтган бир кеча-кундузда 55,9 минг кишида коронавирус аниқланган, шуларнинг 2,3 мингини симптомли беморлар ташкил қилди. Шунингдек, ўтган бир кунда 37,9 мингдан ортиқ одам соғайди, 258 нафари эса вафот этди.
Бундан ташқари, ўтган бир суткада коронавирусга 302 108 та тест топширилган, жами топширилган тестлар сони эса 40 385 250 тага етган.
COVID беморларда пневмония даражаси 3,1 фоизни ташкил қилади, оғир касаллар сони эса 2604 кишига етади.
Туркияда пандемия бошидан буён жами 3,6 миллион киши коронавирус билан касалланган, шуларнинг 33,2 минг нафари вафот этган.
Туркияда 3 апрель куни коронавирусга чалиниш билан боғлиқ 44 756 та янги ҳолат қайд этилган ва бу рекорд даража деб аталган эди.
Туркия ҳукумати коронавирус хавфи туфайли 12 апрелдан 12 майгача дам олиш кунлари амал қилувчи комендантлик соатини жорий қилди. Бу даврда кафе ва ресторанлар таомларни хўрандалар фақат уйга олиб кетиши шарти билан ишлайди. Президент Ражаб Тоййиб Эрдўғон 29 март куни маълум қилишича, коронавирус билан касалланиш бўйича энг юқори хавфни билдирувчи қизил тоифага аллақачон 58 та шаҳар кирган, у ерларда Туркия аҳолисининг 80 фоизи истиқомат қилади.
«Агар беморлар ва ўлимлар сонини биз гуманитар ва тижорий алоқалар олиб борувчи мамлакатлардан кўра тезроқ қисқартира олмасак, глобал нормаллашув жараёнида ортда қолиб кетамиз», — деди Эрдўғон.
Туркияда баъзи йирик шаҳарларда, шу жумладан, Истанбул ва Измирда коронавирус пандемиясининг учинчи тўлқини бошлангани ҳақида ноябрь охирида маълум қилинган эди. Ўша пайтларда мамлакатда дам олиш кунлари амал қилувчи комендантлик соати киритилган эди. Шунингдек, Янги йил байрамлари даврида ҳам комендантлик соати эълон қилинган. Март бошида эса Туркияда баъзи чекловлар бекор қилинганди. Сайёҳлик мавсуми Туркияда апрель ойида очилиши режалаштирилмоқда.
Изоҳ (0)