CNN: АҚШ Россия қўшинларининг кучайтирилиши фонида Украинани қўллаб-қувватлаш белгиси сифатида Қора денгизга ҳарбий кемаларини юбормоқчи

АҚШ Украина чегараси яқинида Россия қўшинлари тўпланган бир пайтда яқин ҳафталар ичида Украинани қўллаб-қувватлаш белгиси сифатида Қора денгизга ўз ҳарбий кемаларини юбориш имкониятини кўриб чиқмоқда. Бу ҳақда CNN АҚШ Мудофаа вазирлигининг исмини ошкор этишни истамаган вакилига таяниб хабар берди, деб ёзади Meduza.

Унинг сўзларига кўра, Америка флоти Қора денгизга мунтазам равишда кириб туради, аммо кемаларнинг у ерга ҳозир юборилиши Россияга АҚШ вазиятни диққат билан кузатаётгани ҳақида сигнал беради.

АҚШ Россия-Украина чегараси яқинида Россия қўшинларининг кучайтирилишини ҳужумга уриниш деб баҳоламайди, деди CNN суҳбатдоши. Аммо, дея давом этди у, «агар нимадир ўзгарса, биз жавоб кўрсатишга тайёр бўламиз».

1936 йилда қабул қилинган кўрфазлар мақоми тўғрисидаги Монтрё конвенциясига мувофиқ, АҚШ Туркияни ўз кемаларини Дарданелл ва Босфор бўғозлари орқали Қора денгизга олиб ўтиш нияти ҳақида 14 кун аввал хабардор қилиши керак. Бундай билдиришнома юборилган-юборилмагани номаълум, дея қайд этди CNN.

Кейинроқ АҚШ Қуролли кучлари Европа қўмондонлиги матбуот хизмати Қора денгизга кемалар юборилишини тасдиқламади. «Айни пайтда бу масала бўйича сиз билан ўртоқлашадиган ҳеч қандай маълумот йўқ», — дея жавоб қилди матбуот хизмати «ТАСС»га.

Эслатиб ўтамиз, Россия қўшинларининг Донбассга тортилиши фонида Украина НАТОга қўшилиш масаласини қайта кўтарди. НАТО бош котиби Йенс Столтенберг билан суҳбатда Зеленский НАТО Донбассдаги урушни тўхтатишнинг ягона йўли эканини айтди. АҚШ бу ғояни ҳозирча назарий жиҳатдан қўллаб-қувватламоқда, Кремлнинг фикрича, Украинанинг НАТОга аъзо бўлиши Донбассдаги инқирозни янада кучайтиради.

Март ойи охирида The New York Times газетаси 4 минг рус қўшини Украина чегараларига, хусусан, Ростов, Брянск, Воронеж вилоятлари ва Қримга юборилгани ҳақида хабар берди. Ҳаммаси бўлиб, Россия Қуролли Кучларининг 28 та тактик баталён гуруҳи чегаралар бўйлаб жойлаштирилган. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади.  Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди, шунингдек, АҚШ президенти Жо Байден лавозимига келганидан бери биринчи марта Украина раҳбари Владимир Зеленскийга қўнғироқ қилди. Кремлнинг таъкидлашича, Россия ўз ҳудудида ўз қўшинларини ҳаракатга келтирмоқда ва «бу ҳеч кимни безовта қилмаслиги керак, қўшин ҳеч кимга таҳдид солмайди».