Европарламент депутатлари Анқарага расмий ташрифи чоғида Европа комиссияси раҳбари Урсула фон дер Ляйенга (аёл киши) Туркия президенти Ражаб Тоййиб Эрдўғон ва Европа кенгаши раҳбари Шарл Мишел билан бир қаторда курси қўйилмагани билан боғлиқ воқеа юзасидан норозилик билдирди, деб ёзади «РИА Новости».
Еврокомиссия раҳбари дипломатик протокол кўра анча паст даражали бўлган ташқи ишлар вазири Мавлуд Чавушўғлининг қаршисида, диванда ўтиришга мажбур бўлди.
Европарламентдаги социалистлар гуруҳи раҳбари Гарисия Перес Ираче фикрича, ҳодиса Анқаранинг яқинда аёлларни ҳимоя қилиш бўйича Истанбул конвенциясидан чиққанини ҳисобга олганда, Туркияда аёлларнинг дискриминацияси билан боғлиқ. «Дастлаб улар Истанбул конвенциясидан чиқди, энди эса Европа комиссияси раисини расмий ташрифи чоғида курсисиз қолдирмоқда. Бу уят», — деб ёзди депутат Twitter’да.
Европарламентдаги бельгиялик депутат Том Вандекенделаре Twitter’да қайд этишича, унинг ватандоши — Европа кенгаши раҳбари Шарл Мишел — Фон дер Ляйенга ўз жойини бўшатиб бериши ёки қабул қилувчи томондан жой билан таъминлашни сўраши мумкин эди.
Еврокомиссия расмий вакили Эрик Мамер 7 апрель куни маълум қилишича, Еврокомиссия раҳбари келгусида халқаро ташрифлар чоғида бундай вазиятларга тушиб қолмаслик учун аллақачон ўз жамоасига зарур чораларни кўришни буюрган. Эрик Мамернинг сўзларига кўра, Еврокомиссиянинг протокол хизмати коронавирус билан боғлиқ чекловлар туфайли шу гал сафарда қатнашмаган эди.
Унинг аниқлик киритишича, Фон дер Ляйен курси билан боғлиқ вазиятдан ҳайратга тушган, аммо «протоколга эмас, масаланинг моҳиятига эътибор қаратиш»ни афзал билган. Шунингдек, унинг айтишича, «бу воқеа музокараларга таъсир ўтказмаган, Еврокомиссия раҳбари режалаштирилган барча масалаларни муҳокама қилишга муваффақ бўлган».
Туркия ташқи ишлар вазири Мавлуд Чавушўғли учрашувда ўриндиқ етишмай қолиши билан боғлиқ воқеа юзасидан мамлакатга нисбатан айбловларни адолатсиз деб атади.
«Биз бу мавзу бўйича ҳеч қанақа баёнет бермоқчи эмасдик, аммо хорижда бу реакцияни келтириб чиқарганини ва Туркияга адолатсиз айбловлар ёғилганини кўрдик. Биз чет эллик меҳмонларни биринчи марта қабул қилаётганимиз йўқ ва туркларнинг анъанавий меҳмондўстлиги бутун дунёга машҳур. Бу учрашувда ҳамма нарса амалдаги халқаро қоидаларга ва одатий протоколга мувофиқ бўлди. Ҳар қандай учрашувдан олдин иккала томондан протокол ходимлари йиғилиб, тафсилотларни ишлаб чиқади», — деди Чавушўғли Анқарада журналистларга.
Унинг қўшимча қилишича, бу сафар ҳам шундай бўлган. «Биз нариги томондан айтилган барча талабларни қондирдик», — деди Туркия вазири.
Шунингдек, Чавушўғли Twitter’да Италия бош вазири Марио Драгининг Туркия президенти Ражаб Тоййиб Эрдўғонни диктатор деб атагани юзасидан пост қолдирди. Драги Фон дер Ляйенга ўриндиқ етишмай қолгани билан боғлиқ ҳодисада Туркия томонининг хулқини хунук деб атаганди.
«Комиссия раиси Урсула фон дер Ляйен бошидан ўтказган камситишни кўрганимдан жуда афсусландим. Келинг, уларни борича диктатор деб атайлик, улар билан муносабатда фикрларни ҳаққоний ифода этиб, ўз мамлакати манфаатлари йўлида ҳамкорликка тайёр бўлиш керак», — деганди Италия бош вазири.
Шундан кейин Чавушўғли Twitter’да Драгининг баёнотини номақбул ва популистик деб атади, Туркия президенти ҳақидаги гапларини эса ярамас ва асоссизга чиқарди.
Кейинроқ Италия элчиси Массимо Гайяни ҳодиса юзасидан Туркия ташқи ишлар вазирлигига чақирилгани хабар берилди.
First they withdraw from the Istambul Convention and now they leave the President of European Commission without a seat in an official visit. Shameful. #WomensRights pic.twitter.com/p5Z4AHuHjK
— Iratxe García Pérez /❤️ (@IratxeGarper) April 6, 2021
Изоҳ (0)