Грузияда AstraZeneca билан эмланган ҳамшира комага тушиб қолди, Франция, Болгария ва Киевда локдаун эълон қилинди, Мексикада қалбаки «Спутник V» аниқланди. Коронахабарлар

Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.

Грузияда AstraZeneca билан эмланган ҳамшира комага тушиб қолди

Грузиянинг Ахалсихе шаҳрида тиббиёт муассасаларидан бирининг ходимаси AstraZeneca вакцинаси билан эмланганидан кейин комага тушиб қолди. 27 ёшли ҳамширада анафилактик шок юзага келгани тахмин қилинмоқда. Ҳамкасблари сўзларига кўра, унинг аҳволи оғир.

Грузия соғлиқни сақлаш вазирлиги AstraZeneca билан эмланган жами уч мингдан ортиқ одамнинг беш нафарида иккиламчи асоратлар кузатилганини тасдиқлади.

Ҳамширадаги анафилактик шок сабаблари аниқланмоқда.

Эслатиб ўтамиз, AstraZeneca вакцинаси билан эмланганларнинг қонида тромб пайдо бўлгани ҳақидаги хабарлардан сўнг бир қатор мамлакатлар препаратдан фойдаланишни тўхтатиб қўйганди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.

Европа дори-дармон агентлиги (EМА) коронавирусга қарши AstraZeneca вакцинаси хавфсиз ва самарали деб эълон қилгач, Европа давлатлари ушбу препарат билан эмлашни қайта бошлади. Хусусан, Германия, Франция, Италия, Испания, Болгария, Португалия ва Словения, шунингдек, Канада ва Латвияда ҳам AstraZeneca билан эмлашни қайта бошлашга рухсат берилди.

Франция ва Болгарияда, шунингдек, Киевда локдаун эълон қилинди

Франция бош вазири Жан Кастекс ва соғлиқни сақлаш вазири Оливье Веран мамлакатда коронавируснинг учинчи тўлқини бошланганини маълум қилди. 20 мартдан бошлаб 16 та департаментда, шу жумладан, Парижда ҳам тўрт ҳафтага тўлиқ карантин жорий қилинмоқда.

Кастекснинг айтишича, бир қанча департаментларда дам олиш кунлари кечқурун 18:00 дан эрталаб 6:00 гача эълон қилинган комендантлик соати ва карантин етарли бўлмаган. Унинг сўзларига кўра, баъзи туманларда касалхоналар ва реанимация бўлимлари «ўз имкониятларининг чегарасигача бориб етган». Ҳукумат Ил-де-Франц ва О-де-Франц минтақалари департаментларини, шунингдек, Денгизбўйи Алп тоғлари, Денгизбўйи Сена ва Эр департаментларини карантинга тўлиқ ёпишга қарор қилди.

Қайд этилишича, Францияда COVID-19’га қарши вакцина етишмаслиги кузатилмоқда. 18 мартга келиб, 5,5 миллион киши битта доза, 2,3 миллион киши — иккита доза билан эмланган. Эмлаш суръатларини ошириш кескин вазиятнинг ягона ечими бўлишини тахмин қилмоқда Франция ҳукумати.

Болгарияда COVID-19 билан касалланиш ҳолатининг ёмонлашиши сабабли 22 мартдан бошлаб ўн кунга қатъий коронавирус чекловлари киритилади. Умумий овқатланиш муассасалари фаолияти тўхтатилади. Фақат етказиб бериш хизмати ишлайди. Йирик савдо марказлари ёпилади, оммавий, спорт, маданий тадбирлар бекор қилинади. Театр ва кинотеатрлар ишламайди. Уйдаги тадбирларда 15 кишидан ортиқ одамнинг тўпланиши тақиқланади.

Сўнгги бир кеча-кундузда Болгарияда 4,2 минг киши коронавирусга чалинди, касалликни юқтириш бўйича умумий ҳолатлар 292 мингтага етди, 12 минг киши вафот этган.

Киев мери Виталий Кличко Украина пойтахтида 20 мартдан қатъий коронавирус чекловларини эълон қилди. Локдаун уч ҳафта — 9 апрелгача амал қилади. Ҳукумат буни вирусга чалиниш ва касалхонага ётқизиш билан боғлиқ ҳолатларнинг кўпайиши билан изоҳлади. Мер коронавирус билан боғлиқ вазиятни мураккаб деб атади ва у ҳалокатга олиб келиши мумкинлигини айтди.

Киевда кинотеатрлар, театрлар, музейлар ва савдо марказлари ёпилади. Оммавий тадбирлар, спорт мусобақаларида томошабинларнинг қатнашиши тақиқланади. Умумий овқатланиш жойлари фақат уйга олиб кетиш учун ишлайди. Спорт залларида гуруҳ машғулотлари тақиқланади, сартарошхона ва гўзаллик салонлари олдиндан ёзилиш шарти билан ишлайди. Мактаблар таътилдан кейин масофавий таълимга қайтади, бюджет соҳасидаги барча корхона ва ташкилотлар ҳам уйдан ишлашга ўтади. Жамоат транспорти 50 фоизга тўлган ҳолда ишлаши мумкин.

Киевда сўнгги уч кундан буён коронавирусга чалиниш бўйича мингдан ортиқ ҳолат қайд этилмоқда. COVID-беморлар учун жойларнинг 70 фоиздан ортиғи тўлган. Киевда жами касалланганлар сони 150 мингга етди, 3 мингга яқини вафот этди.

Мексикада қалбаки «Спутник V» вакцинаси мусодара қилинди

Мексика ҳуқуқ-тартибот органлари контрабанда йўли билан олиб кирилган «Спутник V» вакцинаси партиясини мусодара қилди, у Кампече халқаро аэропортида хусусий самолёт бортидан топилган. Самолёт Гондурасга учиши керак бўлган. 5775 та дозадан иборат флаконлар дорини сақлаш учун зарур бўлган ҳарорат режимини таъминлаш учун муз солинган термоконтейнерларга жойланган.

Айни пайтда Гондурасга олиб киришга уринилган вакцина партиясининг келиб чиқиши ўрганилмоқда. «Спутник V»ни ишлаб чиқаришга раҳбарлик қилувчи Россия тўғридан-тўғри инвестициялар фонди, ўз навбатида, Мексикада аниқланган вакцина қалбаки эканини таъкидламоқда. «Вакцинанинг қалбаки партиясини етказиб беришга уриниш — Россия дорисига қарши эҳтимолий провокацияларга мисол бўла олади», — дейишди фондда.

Россия вакцинаси шу пайтгача дунёнинг 50 дан ортиқ мамлакатида фойдаланиш учун маъқулланган, уни қўллаш учун охирги бўлиб Филиппин рухсат берди.