Россия президенти Владимир Путин АҚШ давлат раҳбари Жо Байденга тўғридан-тўғри эфир орқали мулоқот қилишни таклиф этди. Бу ҳақда «РИА Новости» хабар берди.
«Айни вақтда бир нарса ҳақида ўйлаяпман. Ўтган сафар телефон орқали суҳбатлашиш ташаббуси Байдендан чиққанди. Энди президент Байденга ўз мулоқот таклифимизни айтмоқчиман, мен у билан тўғридан-тўғри эфирда, онлайн форматда суҳбат қилмоқчиман. Ҳеч қандай танаффусларсиз, очиқ ва тўғридан-тўғри мулоқот қиламиз. Менимча, бу Россия халқи учун ҳам, АҚШ фуқаролари учун ҳам, бошқа давлатларда яшовчи одамлар учун ҳам қизиқ суҳбат бўлади», — деган Путин.
Шунингдек, Россия президенти мамлакат Ташқи ишлар вазирлигига мазкур масалани ўрганиб чиқиш юзасидан топшириқ берган.
Жо Байден 17 март куни журналистнинг «Путинни қотил деб ҳисоблайсизми?», дея берган саволига «Ҳа», дея жавоб қилганди. Ушбу ҳодисадан кейин Россия ўз элчисини масалаҳатлашувлар учун Вашингтондан чақиртириб олди. Россия президентининг матбуот котиби Дмитрий Песков ҳам АҚШ президенти Жо Байденнинг Владимир Путин ҳақидаги баёнотларини «жуда ёмон» деб ҳисоблашини маълум қилган.18 март куни Путин Байденнинг мазкур баёнотига жавобан унга мустаҳкам соғлиқ тилаган. Путин болалар учун айтиладиган ҳазилни ҳам эслаган ва «Ким кимнидир ёмонласа, ўша фикрга аслида ўзи муносиб» мазмунидаги жумлани мисол қилиб келтирган.
Изоҳ (0)