Gruziyada AstraZeneca bilan emlangan hamshira komaga tushib qoldi, Fransiya, Bolgariya va Kiyevda lokdaun e’lon qilindi, Meksikada qalbaki “Sputnik V” aniqlandi. Koronaxabarlar

So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.

Gruziyada AstraZeneca bilan emlangan hamshira komaga tushib qoldi

Gruziyaning Axalsixe shahrida tibbiyot muassasalaridan birining xodimasi AstraZeneca vaksinasi bilan emlanganidan keyin komaga tushib qoldi. 27 yoshli hamshirada anafilaktik shok yuzaga kelgani taxmin qilinmoqda. Hamkasblari so‘zlariga ko‘ra, uning ahvoli og‘ir.

Gruziya sog‘liqni saqlash vazirligi AstraZeneca bilan emlangan jami uch mingdan ortiq odamning besh nafarida ikkilamchi asoratlar kuzatilganini tasdiqladi.

Hamshiradagi anafilaktik shok sabablari aniqlanmoqda.

Eslatib o‘tamiz, AstraZeneca vaksinasi bilan emlanganlarning qonida tromb paydo bo‘lgani haqidagi xabarlardan so‘ng bir qator mamlakatlar preparatdan foydalanishni to‘xtatib qo‘ygandi. Xususan, Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan.

Yevropa dori-darmon agentligi (EMA) koronavirusga qarshi AstraZeneca vaksinasi xavfsiz va samarali deb e’lon qilgach, Yevropa davlatlari ushbu preparat bilan emlashni qayta boshladi. Xususan, Germaniya, Fransiya, Italiya, Ispaniya, Bolgariya, Portugaliya va Sloveniya, shuningdek, Kanada va Latviyada ham AstraZeneca bilan emlashni qayta boshlashga ruxsat berildi.

Fransiya va Bolgariyada, shuningdek, Kiyevda lokdaun e’lon qilindi

Fransiya bosh vaziri Jan Kasteks va sog‘liqni saqlash vaziri Olivye Veran mamlakatda koronavirusning uchinchi to‘lqini boshlanganini ma’lum qildi. 20-martdan boshlab 16 ta departamentda, shu jumladan, Parijda ham to‘rt haftaga to‘liq karantin joriy qilinmoqda.

Kasteksning aytishicha, bir qancha departamentlarda dam olish kunlari kechqurun 18:00 dan ertalab 6:00 gacha e’lon qilingan komendantlik soati va karantin yetarli bo‘lmagan. Uning so‘zlariga ko‘ra, ba’zi tumanlarda kasalxonalar va reanimatsiya bo‘limlari “o‘z imkoniyatlarining chegarasigacha borib yetgan”. Hukumat Il-de-Frans va O-de-Frans mintaqalari departamentlarini, shuningdek, Dengizbo‘yi Alp tog‘lari, Dengizbo‘yi Sena va Er departamentlarini karantinga to‘liq yopishga qaror qildi.

Qayd etilishicha, Fransiyada COVID-19’ga qarshi vaksina yetishmasligi kuzatilmoqda. 18-martga kelib, 5,5 million kishi bitta doza, 2,3 million kishi — ikkita doza bilan emlangan. Emlash sur’atlarini oshirish keskin vaziyatning yagona yechimi bo‘lishini taxmin qilmoqda Fransiya hukumati.

Bolgariyada COVID-19 bilan kasallanish holatining yomonlashishi sababli 22-martdan boshlab o‘n kunga qat’iy koronavirus cheklovlari kiritiladi. Umumiy ovqatlanish muassasalari faoliyati to‘xtatiladi. Faqat yetkazib berish xizmati ishlaydi. Yirik savdo markazlari yopiladi, ommaviy, sport, madaniy tadbirlar bekor qilinadi. Teatr va kinoteatrlar ishlamaydi. Uydagi tadbirlarda 15 kishidan ortiq odamning to‘planishi taqiqlanadi.

So‘nggi bir kecha-kunduzda Bolgariyada 4,2 ming kishi koronavirusga chalindi, kasallikni yuqtirish bo‘yicha umumiy holatlar 292 mingtaga yetdi, 12 ming kishi vafot etgan.

Kiyev meri Vitaliy Klichko Ukraina poytaxtida 20-martdan qat’iy koronavirus cheklovlarini e’lon qildi. Lokdaun uch hafta — 9-aprelgacha amal qiladi. Hukumat buni virusga chalinish va kasalxonaga yotqizish bilan bog‘liq holatlarning ko‘payishi bilan izohladi. Mer koronavirus bilan bog‘liq vaziyatni murakkab deb atadi va u halokatga olib kelishi mumkinligini aytdi.

Kiyevda kinoteatrlar, teatrlar, muzeylar va savdo markazlari yopiladi. Ommaviy tadbirlar, sport musobaqalarida tomoshabinlarning qatnashishi taqiqlanadi. Umumiy ovqatlanish joylari faqat uyga olib ketish uchun ishlaydi. Sport zallarida guruh mashg‘ulotlari taqiqlanadi, sartaroshxona va go‘zallik salonlari oldindan yozilish sharti bilan ishlaydi. Maktablar ta’tildan keyin masofaviy ta’limga qaytadi, budjet sohasidagi barcha korxona va tashkilotlar ham uydan ishlashga o‘tadi. Jamoat transporti 50 foizga to‘lgan holda ishlashi mumkin.

Kiyevda so‘nggi uch kundan buyon koronavirusga chalinish bo‘yicha mingdan ortiq holat qayd etilmoqda. COVID-bemorlar uchun joylarning 70 foizdan ortig‘i to‘lgan. Kiyevda jami kasallanganlar soni 150 mingga yetdi, 3 mingga yaqini vafot etdi.

Meksikada qalbaki “Sputnik V” vaksinasi musodara qilindi

Meksika huquq-tartibot organlari kontrabanda yo‘li bilan olib kirilgan “Sputnik V” vaksinasi partiyasini musodara qildi, u Kampeche xalqaro aeroportida xususiy samolyot bortidan topilgan. Samolyot Gondurasga uchishi kerak bo‘lgan. 5775 ta dozadan iborat flakonlar dorini saqlash uchun zarur bo‘lgan harorat rejimini ta’minlash uchun muz solingan termokonteynerlarga joylangan.

Ayni paytda Gondurasga olib kirishga urinilgan vaksina partiyasining kelib chiqishi o‘rganilmoqda. “Sputnik V”ni ishlab chiqarishga rahbarlik qiluvchi Rossiya to‘g‘ridan to‘g‘ri investitsiyalar fondi, o‘z navbatida, Meksikada aniqlangan vaksina qalbaki ekanini ta’kidlamoqda. “Vaksinaning qalbaki partiyasini yetkazib berishga urinish — Rossiya dorisiga qarshi ehtimoliy provokatsiyalarga misol bo‘la oladi”, — deyishdi fondda.

Rossiya vaksinasi shu paytgacha dunyoning 50 dan ortiq mamlakatida foydalanish uchun ma’qullangan, uni qo‘llash uchun oxirgi bo‘lib Filippin ruxsat berdi.