Европа давлатлари коронавирусга қарши AstraZeneca препарати билан эмлаш қайта бошлаганини эълон қилди. Европа Дори-дармон агентлиги (EМА) мутахассисларининг вакцинанинг хавфсизлиги бўйича ўтказган текшируви баёнотидан сўнг шундай қарорга келинди. Мутахассислар препарат туфайли қон томирларида тромб ҳосил бўлишини тасдиқловчи ҳеч қандай далил топмади, деб ёзмоқда «РБК».
Германия соғлиқни сақлаш федерал вазири Йенс Спан мамлакатда 19 март куни AstraZeneca билан эмлаш қайта бошланишини маълум қилди. Вазир душанбадан бери препаратни қўллаш тўхтатилгани сабабли «энди йўқотилган тўрт куннинг ўрнини қоплаш зарур»лигини айтди. У шифокор ва беморларнинг юзага келиши мумкин бўлган хатарлардан бохабар бўлишини таъкидлади. «Фуқаролар эҳтимолий хавфдан шаффоф равишда хабардор қилинишига ишонч билдириши мумкин», — деди Спан.
Францияда AstraZeneca билан эмлаш 19 март куни тушдан кейин қайта бошланади. Франция бош вазири Жан Кастекснинг айтишича, «вакцинага нисбатан тўлиқ ишончни кўрсатиш учун» унинг ўзи жума куни ушбу препарат билан эмланади.
Италия, Испания, Болгария, Португалия ва Словения ҳам AstraZeneca билан эмлашни қайта бошлайди, дея хабар берди Bloomberg.
Мазкур препарат билан эмлашни тўхтатган Швеция эса ўз текширувларини давом эттирмоқда.
EМА’нинг фикрига кўра, эмлаш қон тромблари бўйича умумий хавфни оширмайди ва эмлашнинг коронавирусга қарши фойдаси ножўя таъсирлардан устунроқ. «Жуда кам ҳолларда эмлаш қон тромблари билан боғлиқ бўлиши мумкин», — деб таъкидлади регулятор.
Регулятор маълумотларига кўра, 16 мартга қадар Европада, шу жумладан, Буюк Британияда, 20 миллионга яқин одам AstraZeneca вакцинасини қабул қилган. Ножўя таъсирларни баҳолаш қўмитаси умумий ҳисобда эмланганларнинг 469 нафарида қон тромбларини аниқлади. Вакцина қабул қилганлар сонини ҳисобга олган ҳолда, тромбоз билан оғриган беморларнинг улуши аҳоли орасида кузатиладиган мазкур касалликка учраш бўйича одатий ҳолатининг ўртача кўрсаткичидан паст.
Эслатиб ўтамиз, AstraZeneca вакцинаси билан эмланганларнинг қонида тромб пайдо бўлгани ҳақидаги хабарлардан сўнг бир қатор мамлакатлар препаратдан фойдаланишни тўхтатиб қўйганди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган эди.
ЖССТ AstraZeneca вакцинасидан фойдаланишни тўхтатишга сабаб кўрмаётганини маълум қилди. Кейинроқ AstraZeneca эмлашнинг ножўя таъсири тўғрисидаги хабарларга жавоб берди
Аввалроқ Европанинг ярми рад этган AstraZeneca вакцинасини Тожикистон мамнуният билан қабул қилмоқчилиги ҳақида хабар берилганди.
17 март куни эса Тошкентга AstraZeneca вакцинасининг 660 минг дозаси олиб келинди.
Изоҳ (0)