Шимолий Корея ҳукумати Вашингтон Пхеньянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтди. Бу ҳақда КХДР ташқи ишлар вазирининг биринчи ўринбосари Чвэ Сон Хининг Корея марказий телеграф агентлиги томонидан эълон қилинган баёнотига таяниб «Интерфакс» хабар берди.
Аввалроқ Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхеньян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган эди.
«АҚШ Жанубий Корея билан қўшма ҳарбий машғулотлар бошлашидан бир кун олдин бизга хабар юборди, улар биз билан ишончли тарзда қайта алоқа ўрнатишни сўради. Аммо биз АҚШнинг ўйинларига муносабат билдириб ўтиришга ҳожат йўқ, деб ўйлаймиз», — дейилади баёнотда.
КХДР ташқи ишлар вазирининг ўринбосари агар АҚШ Шимолий Кореяга қарши душманлик сиёсатидан воз кечмаса, корейс-америка алоқалари ва музокараларининг олиб борилиши мумкин эмаслигини таъкидлади. «Шунинг учун биз Қўшма Штатларнинг алоқа ўрнатишга қаратилган бундай уринишларини эътиборсиз қолдиришда давом этамиз», — деди Чвэ Сон Хи.
Унинг таъкидлашича, Пхеньян ва Вашингтон ўртасидаги мулоқот «бир столда тенг ҳуқуқли ўтириб, фикр алмашиш» муҳитини талаб қилади.
Шимолий Корея ташқи ишлар вазирининг ўринбосари қўшимча қилишича, Пхеньян «АҚШнинг севимли санкцияларига» жавоб қайтаришга тайёр.
«Биз аллақачон ‘жангга жанг’ ва ‘яхшиликка яхшилик’ тамойиллари бўйича АҚШга қарши турамиз, деб қарор қилганмиз», — дея хулоса қилди Чвэ Сон Хи.
Эслатиб ўтамиз, 16 март куни Шимолий Корея етакчиси Ким Чен Иннинг синглиси, Корея Меҳнат партияси (КМП) Сиёсий бюроси аъзоси Ким Ё Чжон Жанубий Корея ва АҚШнинг қўшма ҳарбий машғулотлари муносабати билан КХДРнинг Ватанни тинч йўл билан бирлаштириш бўйича тузилган қўмитани тугатиш масаласини кўтариб, Сеул билан тузилган тинчлик битимидан бош тортиши ҳақида таҳдид қилган эди. Бундан ташқари, у АҚШ президенти Жо Байден маъмуриятини яқин тўрт йил ичида бемалол ухлашимга тўсқинлик қиладиган ҳеч нарса қилмагани яхшироқ, деб огоҳлантирган. Бу Шимолий Кореянинг Байден маъмуриятига президент инаугурациядан кейинги биринчи мурожаатидир.
Изоҳ (0)