АҚШ собиқ президенти Дональд Трампнинг бойлиги 2021 йил март ойининг ўрталарига келиб, у президентлик қилган даври бошидаги 3 миллиард доллардан 2,3 миллиард долларгача камайган. Bloomberg агентлигининг ҳисоб-китоблари келтирилган Bloomberg Billionaires Index (BBI) маълумотлари шундан далолат бермоқда, деб ёзади Tengrinews.
Агентлик Трампнинг АҚШ президенти бўлишидан олдинги ва кейинги бойлигини ҳисоблаш учун 2016 йил майидан 2021 йил январигача юритилган молиявий ва бошқа ҳужжатларни таҳлил қилди. Трампнинг бойлиги 2020 йил августида пасайишни бошлаган, 2021 йил январида эса 2,45 миллиард долларни ташкил қилган ҳамда мартнинг ўрталарига келиб 2,33 миллиард долларга тушган.
Агентлик маълумотларига кўра, Трамп бойлигининг тўртдан уч қисми тижорий кўчмас мулкка тўғри келади. Коронавирус пандемияси туфайли одамлар кўпроқ уйдан ишлагани сабабли Трампнинг ўзи ёки ҳамкорликда эгалик қиладиган офис бинолари қиймати кескин тушиб кетди. Агентликнинг ёзишича, Трампнинг тижорий кўчмас мулки қиймати 1,7 миллиард долларга баҳоланмоқда, 2016—2021 йилларда унинг баҳоси 26 фоизга пасайган.
Бундан ташқари, Трамп кўплаб меҳмонхона ва курортларга эгалик қилади ёки бошқаради, шунингдек, унга тегишли компания 19 та гольф майдончасини бошқаради.
Маълумот учун, АҚШнинг 45-президенти Дональд Трамп ушбу лавозимда 2017 йил 20 январдан 2021 йил 20 январгача фаолият юритган.
Изоҳ (0)