Англия шарқида ва жануби-шарқида, шу жумладан, Лондонда ҳам 20 декабрдан чекловларнинг янги, тўртинчи даражаси амал қилишни бошлайди. Бу ҳақда Буюк Британия бош вазири Борис Жонсон маълум қилди, деб ёзади Meduza.

Фото: Getty Images

Тўртинчи даражали хавф эълон қилинган ҳудудларга кириш ва у ердан чиқиш тақиқланган. Бу туманлар аҳолиси, алоҳида эҳтиёж бўлмаса, уйидан чиқиши мумкин эмас. Бирга яшамайдиган одамлар фақат кўчада кўришиши мумкин. Энг зарур маҳсулотлар билан савдо қиладиган дўконлар ва дорихоналаргина ишлашда давом этади. Бундан ташқари, аввалроқ қоидалар юмшатилиб, Рождествода кўпи билан учта оиланинг бир жойга тўпланишига берилган рухсат ҳам бекор қилинди.

Янги чекловлар камида икки ҳафта амал қилади. Улар коронавируснинг янги тури тарқалгани туфайли жорий этилмоқда, у эса, Жонсоннинг сўзларига кўра, 70 фоизга юқумлироқ бўлиши мумкин. Ҳозирда Лондонда қайд этилган касалланиш ҳолатларининг 60 фоизи вируснинг янги штамми билан боғланмоқда.

20 декабрдан чекловларнинг тўртинчи даражаси Уэльсда, 26 декабрдан Шотландияда ҳам амал қила бошлайди. Шунингдек, Рождество байрамлари даврида ҳукумат Шотландияга кириш ва чиқишни ёпиб қўяди.

2020 йилнинг кузида Буюк Британияда чекловларнинг уч даражали тизими жорий қилинган эди, у минтақадаги коронавирус ҳолатлари сонига боғлиқдир. Бундан аввалги, учинчи даражали чекловлар Лондонда 16 декабрдан кучга кирган эди.

19 декабрь ҳолатига кўра Буюк Британияда COVID-19’ни юқтириб олиш билан боғлиқ 2 миллиондан ортиқ ҳолат аниқланган. Бир кеча-кундузда бундай ҳолатлар 27 мингтага кўпайган. Пандемия бошидан буён мамлакатда 76 мингдан зиёд одам коронавирусдан вафот этган.

Эслатиб ўтамиз, Жаҳон соғлиқни сақлаш ташкилоти коронавирус инфекцияси пандемияси муносабати билан Европа аҳолисига Рождество ва Янги йилни кутиб олиш учун иложи борича кўчада тўпланишни тавсия қилган эди.

COVID-19 бўйича ЖССТнинг махсус вакили Дэвид Набарро Буюк Британияда аниқланган COVID-19’нинг янги тури тез тарқалиш хусусиятига эга, лекин хавфлилик даражаси юқори эмаслигини маълум қилган эди.