Исроил бош вазири онлайн эфирда Pfizer вакцинаси билан эмланди

Исроил бош вазири Бинямин Нетаньяху мамлакатда биринчилардан бўлиб коронавирусга қарши Pfizer вакцинаси билан эмланди. Бу ҳақда «РБК» хабар бермоқда. Эмлаш жараёни Исроилнинг бир неча телеканаллари орқали  тўғридан-тўғри эфирда намойиш этилган.

חיסון בשידור חי | "על זה נאמר זריקה קטנה לאדם, וצעד ענק לבריאות של כולנו": רה"מ נתניהו קיבל את החיסון לקורונה#חדשותהשבתhttps://t.co/aErNzpt9kZ pic.twitter.com/rWVCiJRtFM

— כאן חדשות (@kann_news) December 19, 2020

Бош вазир ўзининг Twitter’ида «Одам учун кичик бир укол — барчамиз соғлиғимиз учун катта қадамдир», — деб ёзган. Шунингдек, Исроил COVID-19’га қарши вакцина олган биринчи давлатлардан бири бўлганини таъкидлаган.

Нетаньяху коронавирусга қарши вакцинани хавфсиз деб айтган ва декабрь ойи охирига қадар мамлакатга препаратнинг «миллион доза»сини олишни ваъда қилган. У бошқаларга намуна бўлиш учун биринчилардан бўлиб вакцина қабул қилишга қарор қилганини билдирган.

Эслатиб ўтамиз, коронавирусга қарши Pfizer вакцинасини бутун дунё бўйлаб тарқатиш ноябрь ойи охиридан бошланди. Британия дунёда биринчи бўлиб ушбу компания вакцинасидан фойдаланишни маъқуллади. Бундан ташқари, АҚШ,  Баҳрайн, Мексика, Канада ва Швейцарияда у фойдаланиш учун тасдиқланган.

Pfizer 2020 йил охирига қадар, олдинроқ режалаштирилганидек, 100 миллион эмас, балки 50 миллион доза вакцина ишлаб чиқара олади.

Аввалроқ АҚШда Pfizer вакцинаси билан эмланган икки тиббиёт ходимининг аҳволи ёмонлашган, синовлардаги 6 кўнгилли эса вафот этгани ҳақида хабар берилганди.