Koronavirusning yangi turi aniqlangani sababli Londonda eng yuqori karantin cheklovlari joriy qilinadi

Buyuk Britaniya poytaxti Londonda 16-dekabrdan koronavirusga qarshi eng yuqori cheklov choralari (uchinchi darajadagi cheklovlar) joriy qilinadi. Bu haqda mamlakat sog‘liqni saqlash vaziri Mett Xenkok ma’lum qildi, deb yozmoqda Meduza.

Uchinchi darajadagi cheklovlar Janubiy va G‘arbiy Esseksda hamda Xartfordshirning janubida ham joriy etiladi.

Vazirning so‘zlariga ko‘ra, cheklovlarni kuchaytirish haqidagi qaror mamlakatda koronavirusning yangi turi aniqlanganidan keyin qabul qilingan. Qayd etilishicha, yangi tur boshqalaridan ko‘ra tezroq tarqalayotgan bo‘lishi mumkin, biroq uning og‘irroq kasallikni keltirib chiqarish ehtimoli past baholanmoqda.

Uchinchi darajadagi cheklovlar restoranlar, kafe va barlar faqat yetkazib berish hamda olib ketish uchun ishlashi mumkinligini nazarda tutadi. Binolar ichidagi uchrashuvlar taqiqlanadi, ochiq havoda esa olti kishidan ortiq to‘planish mumkin emas.

Jons Hopkins universiteti ma’lumotlariga ko‘ra, Buyuk Britaniyada shu paytgacha COVID-19 bilan kasallanish bo‘yicha 1,8 millionta holat qayd etilgan. 13-dekabr kuni 18,4 mingta yangi holat aniqlangan, 7—13-dekabr kunlari 126,2 mingta yangi holat ro‘yxatga olingan, bu esa avvalgi haftaga nisbatan 20 foizga ko‘proq.