АҚШ президенти Дональд Трамп администрациясининг юқори мартабали амалдорлари давлат раҳбари ўз ваколатини суиистеъмол қилиб, сайлов натижаларини бекор қилишидан хавотирда. «Коммерсантъ»нинг ёзишича, бу ҳақда Axios манбалари хабар берди.
Хавотирнинг сабаби президент ўзининг миллий хавфсизлик бўйича собиқ ёрдамчиси Майкл Флинн ва адвокат Сидни Пауэлл билан кўп вақт ўтказаётгани билан боғлиқ.
Қайд этилишича, «президентнинг Twitter’да сиёсатчиларни қамаш билан таҳдид қилиши ва ақлдан озган фитна назариётчилари билан суҳбатлашишга кўп вақт сарфлаши» ташвишлантирмай қолмайди.
Аввалроқ Майкл Флинн президентга ҳарбий ҳолат эълон қилиш ва иккиланадиган штатларда қайтадан сайлов ўтказиш учун ҳарбий қўшинлардан фойдаланишни таклиф қилган. Сидни Пауэлл эса овоз берувчи машиналарни текширувдан ўтказишни таклиф қилган.
Сайлов натижасига кўра, демократ Жо Байден 306 тадан 270 та овозни қўлга киритган. Дональд Трамп 232 та овоз олган. Барча «иккиланган» штатларда Байден фойдасига овоз берилган. Трамп сайлов натижаларини тан олмаган. У овозларни сохталаштирилган деб ҳисоблайди.
Эслатиб ўтамиз, 15 декабрь куни сайловчилар ҳайъати Жо Байденнинг АҚШ президенти этиб сайланганини тасдиқлади. Байден учун сайловчиларнинг 306 та, Дональд Трамп учун 232 та овози берилган. Ғалаба учун эса 270 та овоз тўплаш керак эди. 23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.
Декабрь ойи бошида Трамп сайловлар ҳалол бўлган тақдирдагина мағлубиятини тан олишини билдирганди. «Мен сайловда мағлуб бўлишга қарши эмас, балки у адолатли бўлишини хоҳлайман. Истамайдиган нарсам шуки, сайловлар Америка халқидан ўғирлаб олинмасин», — деган эди Трамп. Кейинроқ у 2024 йилда давлат раҳбари лавозимига ўз номзодини қўйиши мумкинлигини айтган.
Изоҳ (0)