Беларусь молия вазири мамлакатдан автомобилда чиққанлик учун йиғим жорий қилиш таклифини киритди, деб ёзади Meduza.
Беларуснинг «Белта» агентлиги молия вазири Юрий Селиверстовга таяниб маълум қилишича, режага кўра, йиғимни вилоят ҳукуматлари жорий қила олади. Максимал оғирлиги беш тоннадан ошмайдиган транспорт воситаларида мамлакатдан чиқиб кетаётганлар бу тўловни тўлайди.
Йиғим миқдори учта таянч қийматдан ошмайди. Бир таянч қийматнинг 2021 йилдаги миқдори 29 Беларусь рубли (11,55 доллар)га тенг бўлади.
“Tut.by” қайд этишича, Беларусдан Россияга йиғим тўламасдан кетиш мумкин бўлади.
Агар бундай йиғим маъқулланса, тўпланган маблағлар ўтказиш пунктини дезинфекция қилиш, зарур нарсалар билан таъминлашга йўналтирилади.
Беларусдан автомобилда чиқиб кетганлик учун йиғим Солиқ кодексига ўзгартиришлар киритиш тўғрисидаги қонун лойиҳасида кўзда тутилган. 18 декабрь куни у Беларусь парламентининг қуйи палатаси — Вакиллар палатаси томонидан қабул қилинди. Энди ҳужжат имзолаш учун Александр Лукашенкога юборилди.
20 декабрдан Беларусь фуқароларига ва ушбу мамлакатда истиқомат гувоҳномасига эга чет элликларга мамлакатдан қуруқликдаги чегаралар орқали чиқиб кетиш тақиқланди (Россия билан чегарадан ташқари). Коронавирус пандемияси бунга расмий сабаб сифатида келтирилди. Қуруқликдаги чегаралар орқали Беларусга кириш эса 30 октябрдан ман этилган эди.
Мавзуга доир:
- Швейцария Европа Иттифоқи ортидан Лукашенкога қарши санкцияларни жорий этди
- Беларусь аҳолисига қуруқлик чегара пунктлари орқали мамлакатдан чиқиш тақиқланди
- Александр Лукашенко Арманистонга Тоғли Қорабоғнинг бир қисмини 5 млрд доллар эвазига Озарбайжонга беришни тавсия қилгани маълум бўлди
- Александр Лукашенконинг Олимпиада ўйинларига ташриф буюриши тақиқланди
- Тихановская Беларусда ҳокимият алмашинуви босқичлари ҳақида маълум қилди
Изоҳ (0)