Коронавирусга чалинган Владимир Зеленский касалхонага ётқизилди

Коронавирус билан касалланган Украина президенти Владимир Зеленский касалхонага ётқизилди. Бу ҳақда президент девони раҳбари Андрей Ермакнинг маслаҳатчиси Михаил Подоляк «Украинская Правда»га берган интервьюсида айтиб ўтди, дея хабар бермоқда Meduza.

Маълум қилинишича, коронавирусга чалинган Ермак ҳам Зеленский билан бирга Феофания касалхонасига ётқизилган.

Михаил Подолякнинг сўзларига кўра, шифохонада Зеленскийга конференс-қўнғироқлар учун хона жиҳозланган ва унинг бўлимида махсус алоқа ўтказилган.

Зеленский ва унинг идораси раҳбари Подолякнинг айтишича, шифохонада нормал иш тартиби мавжуд. «Фақатгина чеклов – бу изоляция, атрофда ҳеч ким йўқ», – деди Подоляк.

Эслатиб ўтамиз, 9 ноябрь куни Украина президенти девони Владимир Зеленскийда коронавирус аниқланганини маълум қилди. Шу куни президент девони раҳбари Андрей Ермак ҳам коронавирусга чалингани маълум бўлди. Зеленский Twitter’да ўзини яхши ҳис қилаётгани, ишлашда давом этаётгани ва касалликни енгиб ўтишига ишончи комил эканини таъкидлади.

Жонс Ҳопкинс университети маълумотларига кўра, Украинада коронавирусга чалиниш билан боғлиқ 504 423 та ҳолат қайд этилган. Беморларнинг 237 399 нафари соғайган, 9 422 нафари вафот этган.

Аввалроқ Украинада фавқулодда ҳолат режими узайтирилгани хабар қилинган эди.