Буюк Британия шимоли-ғарбида жойлашган Чешир графлиги полицияси Люси Летби исмли ҳамширани саккиз нафар чақалоқни ўлдириш ва 10 нафар янги туғилган чақалоқ ҳаётига суиқасд уюштириш айблови билан қўлга олди. Бу ҳақда идора баёнотига таяниб, «РБК» хабар берди.
Ҳуқуқ-тартибот органларининг маълумотларига кўра, 30 ёшли Летби Countess of Chester Hospital касалхонасининг неонатал бўлинмасида ишлаган. Тергов версиясига кўра, айбланувчи 2015 йилнинг июнидан 2016 йил июнига қадар амалга оширилган қотилликларга алоқадор бўлиши мумкин. Полиция аёлни ҳибсга олган.
Айбланувчи 12 ноябрь куни судда жавоб беради.
Маълумотларга кўра, Люси Летби 2018 йилнинг 3 июлида касалхонанинг неонатал бўлинмасидаги 17 нафар боланинг ўлими доирасида ўтказилган терговлар сабаб қўлга олинган. Унга айблов эълон қилинган ва гаров эвазига қўйиб юборилган. Маълум қилинишича, ҳамшира тергов билан ҳамкорлик қилган. Кейинроқ Чешир графлиги полицияси ҳамширага яна уч нафар боланинг ўлими юзасидан айблов эълон қилган.
Эслатиб ўтамиз, 2014 йили Италияда ҳамшира 39 нафар беморни ўлдиришда гумон қилиниб, қўлга олинганди. Таъкидланишича, ҳамшира ўзининг ғашини келтирган қарияларни ўлдирган.
Изоҳ (0)