Koronavirus bilan kasallangan Ukraina prezidenti Vladimir Zelenskiy kasalxonaga yotqizildi. Bu haqda prezident devoni rahbari Andrey Yermakning maslahatchisi Mixail Podolyak “Ukrainskaya Pravda”ga bergan intervyusida aytib o‘tdi, deya xabar bermoqda Meduza.
Ma’lum qilinishicha, koronavirusga chalingan Yermak ham Zelenskiy bilan birga Feofaniya kasalxonasiga yotqizilgan.
Mixail Podolyakning so‘zlariga ko‘ra, shifoxonada Zelenskiyga konferens-qo‘ng‘iroqlar uchun xona jihozlangan va uning bo‘limida maxsus aloqa o‘tkazilgan.
Zelenskiy va uning idorasi rahbari Podolyakning aytishicha, shifoxonada normal ish tartibi mavjud. “Faqatgina cheklov – bu izolyatsiya, atrofda hech kim yo‘q”, – dedi Podolyak.
Eslatib o‘tamiz, 9-noyabr kuni Ukraina prezidenti devoni Vladimir Zelenskiyda koronavirus aniqlanganini ma’lum qildi. Shu kuni prezident devoni rahbari Andrey Yermak ham koronavirusga chalingani ma’lum bo‘ldi. Zelenskiy Twitter’da o‘zini yaxshi his qilayotgani, ishlashda davom etayotgani va kasallikni yengib o‘tishiga ishonchi komil ekanini ta’kidladi.
Jons Hopkins universiteti ma’lumotlariga ko‘ra, Ukrainada koronavirusga chalinish bilan bog‘liq 504 423 ta holat qayd etilgan. Bemorlarning 237 399 nafari sog‘aygan, 9 422 nafari vafot etgan.
Avvalroq Ukrainada favqulodda holat rejimi uzaytirilgani xabar qilingan edi.
Izoh (0)