Жанубий Корея президенти Мун Чже Ин 12 ноябрь куни Жозеф Байден билан телефон орқали мулоқот қилиб, уни АҚШ президентлиги сайловларида эришган ғалабаси билан табриклади, деб хабар беради «ТАСС».
«Ҳозиргина Жо Байден билан гаплашдим ва уни сайлангани билан табрикладим. Биз Жанубий Корея—Америка ҳамкорлиги ҳамда Корея яриморолида тинчлик ва фаровонликни ўрнатиш тарафдори эканлигимизни яна бир бор тасдиқладик» — деб ёзади Корея етакчиси ўзининг Twitter’даги саҳифасига.
Унинг қўшимча қилишича, мамлакат Қўшма Штатлар билан ҳамкорликни давом эттиради, жумладан, коронавирус ва иқлим муаммолари бўйича ҳам.
Аввалроқ Туркия президенти Ражаб Тоййиб Эрдўғон ва БМТ бош котиби Антониу Гутерриш Жо Байденни АҚШ президентлиги сайловидаги ғалаба билан табриклаган эди. Россия президентининг матбуот котиби Дмиртий Песков эса Путин «сайлов натижалари расман эълон қилинганидан кейин» табриклашини билдирган.
Эслатиб ўтамиз, 7 ноябрь куни Associated Press, CNN, The New York Times, ABC News, Fox News ва бошқа ОАВлар Жо Байденни АҚШнинг сайланган президенти деб эълон қилди. ОАВ ҳисоб-китобларига кўра, президентликка номзод – Демократик партиядан кўрсатилган собиқ вице-президент Жо Байден Пенсильвания штатида ғалаба қозонган ва президент сайловида ғолиб чиқиш учун танловчиларнинг камида 270 та овози керак бўлган ҳолатда 273 та овозни қўлга киритган.
Мавзуга доир: АҚШнинг Жоржия штатида Дональд Трамп ва Жо Байденга берилган овозлар қайта санаб чиқилади
Изоҳ (0)