Исроилда жорий этилган иккинчи карантин биринчисидан кўра самаралироқ бўлиб чиқди

Исроилда пандемия сабаб жорий этилган иккинчи карантин биринчисидан кўра самаралироқ бўлиб чиқди. Бу ҳақда The Wall Street Journal’га таяниб, «РБК» хабар берди.

Исроилда коронавирус билан касалланишнинг янги ҳолатлари октябрь ойи бошларида энг юқори чўққига чиққан бўлиб, суткалик касалланиш кўрсаткичи 9 мингга яқинни ташкил этган. Октябрь охирларига бориб суткалик ўсиш 700 га тушди.

«Иккинчи карантин биринчисига қараганда у қадар қаттиқ бўлмади. Бироқ статистика ҳайратланарли бўлиб чиқди», — дейди Вейсман номидаги Исроил ҳисоб биологияси институти мутахассиси Эран Сегал.

Сегалнинг фикрича, касаллик тарқалишининг кескин камайишига жамоат жойларида ниқоб тақиш мажбурий этиб белгилангани сабаб бўлган. Унинг таъкидлашича, ҳукумат статистикасига кўра, иккинчи локдаун вирус тарқалиш даражасининг ўн кун ичида пасайишига олиб келган.

Коронавирус бўйича ҳукуматга консультация берадиган экспертлар гуруҳининг раиси Ран Балисер ниқоб тақиш коронавирусга қарши курашда сезиларли даражада таъсир кўрсатгани тўғрисидаги фикрларга қўшилган. «Мажбурий ниқоб тақиш ва ниқобларнинг жамият томонидан кенг тан олиниши касаллар сонининг кескин камайишида муҳим рол ўйнади», — дейди Балисер.

WSJ’нинг ёзишича, Исроилда ниқоб режимини бузганлар 150 доллар миқдорида жаримага тортилган. Исроил полицияси вакили Мики Розенфелнинг сўзларига кўра, иккинчи карантин вақтида ҳар ҳафта 10 мингга яқин жарима белгиланган.

Ўтган бир сутка ичида Исроилда яна 411 кишида коронавирус аниқланди, бутун мамлакат бўйлаб пандемия бошланганидан буён COVID-19 билан касалланганлар сони 314 мингга етган. Ҳозирга қадар 2553 киши вирус қурбонига айланган.

Эслатиб ўтамиз, Исроилда иккинчи карантин 18 сентябрда жорий этилган, 25 сентябрдан 18 октябрга қадар эса у кучайтирилган. 18 октябрдан карантинни енгиллаштиришнинг биринчи босқичига старт берилган.

Аввалроқ Германия ва Францияда қайтадан карантин бошлангани Норвегия, Чехия, Словения, Дания ва Испанияда бир қатор чекловлар жорий этилгани, Португалияда аҳолининг мамлакат бўйлаб ҳаракатланиши тақиқлангани тўғрисида хабар берилганди.