Тоғли Қорабоғдаги вазиятни тартибга келтириш учун ушбу ҳудудга Скандинавиядан тинчликпарварларни жойлаштириш мақсадга мувофиқ. Бу ҳақда АҚШ президентининг миллий хавфсизлик масалалари бўйича ёрдамчиси Роберт O’Брайен Лос-Анжелесдаги арман диаспораси билан ўтказилган учрашувда маълум қилган, деб ёзмоқда «Korrespondent.net».
ЎБраен тинчликпарварларнинг Туркиядан, балки Европада хавфсизлик ва ҳамкорлик ташкилотининг Минск гуруҳига аъзо мамлакатлар орасидан, хусусан, АҚШдан, шунингдек, Арманистон ва Озарбайжонга қўшни мамлакатлар орасидан танланмаслиги кераклигини айтган.
«Иккала мамлакат ҳам скандинавиялик тинчликпарварларнинг ҳудудга киритилишига розилик бериши лозим. Биз Скандинавия мамлакатларининг ҳукуматлари билан ҳудудга киритиладиган тинчликпарварлар гуруҳини шакллантириш ва Қорабоғда ўт очмаслик режимини қўллаб-қувватлаш юзасидан иш олиб боряпмиз», – деган АҚШ сиёсатчиси.
Унинг сўзларига кўра, Тоғли Қорабоғда ўт очмаслик режимига риоя этилишини таъминлаш кўп миллатли тинчликсевар кучлар ёки кузатувчиларнинг иштирокисиз амалга ошмайди.
Эслатиб ўтамиз, Скандинавия мамлакатларига Норвегия, Швеция, Дания ва Финляндия давлатлари киради.
Аввалроқ Ереваннинг Россиядан Тоғли Қорабоғда хавфсизликни таъминлашни сўрагани хабар қилинган. Москва бунга жавобан жанглар Арманистон ҳудудига ўтадиган бўлса, ёрдам кўрсатишга тайёрлигини билдирганди.
Боку эса учинчи томоннинг, яъни бошқа мамлакатларнинг ушбу қуролли низога аралашувига қарши экани, турк ҳарбийларининг жангларда иштирок этмаётганини маълум қилган.
Тоғли Қорабоғдаги ҳарбий ҳаракатлар тинчликка эришиш учун қилинган учта уринишга қарамасдан, 27 сентябрдан буён давом этмоқда.
Изоҳ (0)