АҚШ президенти Дональд Трамп америкалик шифокорларни кўпроқ пул ишлаш учун коронавирус статистикасини атайин ошириб ёзганликда айблади. «Коммерсантъ»нинг CNN’га таяниб хабар беришича, бу ҳақда у 31 октябрь куни Мичиган штатидаги сайловолди йиғилишида айтган.
«Бизнинг шифокорларимиз жуда ақлли одамлар. Хўш, улар нима қилишяпти. Улар, кечирасиз, ҳамма COVID’дан вафот этяпти, деяпти... бу эса қўшимча 2 минг доллар дегани, шунинг учун уларда пул кўп», — деган Трамп.
Хабарда айтилишича, 30 октябрь куни АҚШда суткалик касалланишлар сони бўйича бутун пандемия даври давомидаги энг юқори кўрсаткич қайд этилди. Мамлакатнинг 17 та штатида эса касалхонага ётқизилганлар сони рекорд даражага етди. Бу уч кун ичида учинчи суткалик антирекорд бўлди.
Эслатиб ўтамиз, АҚШда 30 октябрь куни яна 100 мингдан ортиқ одамда коронавирус аниқланди. 3 октябрь куни Дональд Трамп коронавирусга қарши Америка вакцинаси тез орада пайдо бўлишини эълон қилганди. 25 октябрь куни эса COVID-19’га қарши вакцина пандемияга нуқта қўйишини билдирди.
АҚШ собиқ президенти Барак Обама эса Трампнинг америкаликларни коронавирусдан ҳимоя қила олишига шубҳа қилмоқда.
Изоҳ (0)