Isroilda joriy etilgan ikkinchi karantin birinchisidan ko‘ra samaraliroq bo‘lib chiqdi

Isroilda pandemiya sabab joriy etilgan ikkinchi karantin birinchisidan ko‘ra samaraliroq bo‘lib chiqdi. Bu haqda The Wall Street Journal’ga tayanib, “RBK” xabar berdi.

Isroilda koronavirus bilan kasallanishning yangi holatlari oktabr oyi boshlarida eng yuqori cho‘qqiga chiqqan bo‘lib, sutkalik kasallanish ko‘rsatkichi 9 mingga yaqinni tashkil etgan. Oktabr oxirlariga borib sutkalik o‘sish 700 ga tushdi.

“Ikkinchi karantin birinchisiga qaraganda u qadar qattiq bo‘lmadi. Biroq statistika hayratlanarli bo‘lib chiqdi”, — deydi Veysman nomidagi Isroil hisob biologiyasi instituti mutaxassisi Eran Segal.

Segalning fikricha, kasallik tarqalishining keskin kamayishiga jamoat joylarida niqob taqish majburiy etib belgilangani sabab bo‘lgan. Uning ta’kidlashicha, hukumat statistikasiga ko‘ra, ikkinchi lokdaun virus tarqalish darajasining o‘n kun ichida pasayishiga olib kelgan.

Koronavirus bo‘yicha hukumatga konsultatsiya beradigan ekspertlar guruhining raisi Ran Baliser niqob taqish koronavirusga qarshi kurashda sezilarli darajada ta’sir ko‘rsatgani to‘g‘risidagi fikrlarga qo‘shilgan. “Majburiy niqob taqish va niqoblarning jamiyat tomonidan keng tan olinishi kasallar sonining keskin kamayishida muhim rol o‘ynadi”, — deydi Baliser.

WSJ’ning yozishicha, Isroilda niqob rejimini buzganlar 150 dollar miqdorida jarimaga tortilgan. Isroil politsiyasi vakili Miki Rozenfelning so‘zlariga ko‘ra, ikkinchi karantin vaqtida har hafta 10 mingga yaqin jarima belgilangan.

O‘tgan bir sutka ichida Isroilda yana 411 kishida koronavirus aniqlandi, butun mamlakat bo‘ylab pandemiya boshlanganidan buyon COVID-19 bilan kasallanganlar soni 314 mingga yetgan. Hozirga qadar 2553 kishi virus qurboniga aylangan.

Eslatib o‘tamiz, Isroilda ikkinchi karantin 18-sentabrda joriy etilgan, 25-sentabrdan 18-oktabrga qadar esa u kuchaytirilgan. 18-oktabrdan karantinni yengillashtirishning birinchi bosqichiga start berilgan.

Avvalroq Germaniya va Fransiyada qaytadan karantin boshlangani Norvegiya, Chexiya, Sloveniya, Daniya va Ispaniyada bir qator cheklovlar joriy etilgani, Portugaliyada aholining mamlakat bo‘ylab harakatlanishi taqiqlangani to‘g‘risida xabar berilgandi.