Apple компанияси Хитойдаги савдолар 2014 йилдан буён кузатилган энг паст даражага тушиб кетганини маълум қилди. iPhone ишлаб чиқарувчининг Хитойдаги даромади июлдан сентябрга қадар 2019 йилнинг мос даврига нисбатан 29 фоизга тушиб кетиб, 7,95 миллиард долларни ташкил этди, деб хабар беради «РБК».
Бу каби пасайиш компания акциялари қийматига ҳам таъсир кўрсатди — 29 октябрь кунги котировкаларда Apple 4,21 фоиз йўқотган, бу компаниянинг бозордаги қийматини салкам 83 миллиард долларга тушириб юборди.
Apple бизнеси учун муҳим минтақалардан бири ҳисобланувчи мамлакатдаги бу каби савдо натижалари инвесторларни хавотирга солиб қўйган. Бозордагиларнинг ҳисоблашича, технологик гигант рақобатда маҳаллий ишлаб чиқарувчиларга ютқазиб қўймоқда.
Компаниядагилар эса бу каби пасайишни iPhone 12’нинг тақдимоти кечиккани билан изоҳламоқда. Apple одатда ўзининг янги моделларини учинчи чоракда тақдим этади. Бироқ 2020 йилда пандемия компаниянинг етказиб бериш занжирини бузиб юборган ва тақдимотни октябрь кўчиришга мажбур бўлган.
Bloomberg’нинг ёзишича, пандемияга қадар ҳам Apple 5G имкониятига эга смартфонларни яратишда бошқа рақобатчиларига қараганда секинроқ ҳаракат қилган. Samsung, Huawei ва Xiaomi каби компаниялар 5G алоқа тармоғини қўллаб-қувватлайдиган қурилмаларни 2019 йилда тақдим этган. 2020 йилда эса шу каби технологияга эга ҳамёнбоп смартфонлар серияси пайдо бўла бошлади. Буларнинг барча Apple ўз қурилмаларни тақдим этгунга қадар содир бўлган.
Strategy Analytics тадқиқот компаниясининг маълумотларига кўра, бешинчи авлод алоқа тармоғига эга смартфонлар савдоси бўйича Samsung компанияси Galaxy S20+ билан етакчилик қилмоқда. У бутун дунё бўйлаб сотилган 5G’га эга смартфонлардан тушган даромаднинг 9 фоизига эгалик қилади. Иккинчи ва учинчи ўринларни ҳам Samsung смартфонлари эгаллаган.
Шунга қарамай, Apple чорак якунлари бўйича умумий савдо ҳажмини 1,03 фоизга (64,7 миллиард долларга қадар) оширишга муваффақ бўлган. Компания Хитойдаги омадсизлигини Маc компьютерлари (29,2 фоиз), iPad планшетлари (46 фоиз) савдоси ва хизматлари (16,3 фоиз) орқали қоплаган. iPhone савдоси эса 21 фоизга — 26,4 миллиард долларга тушиб кетган.
Изоҳ (0)