Россияда сутка давомида 18 283 нафар одамда COVID-19 аниқланди. Бу мамлакатда қайд этилган янги рекорд

Россияда сўнгги бир сутка ичида 18 283 та коронавирус билан касалланиш ҳолати қайд этилди, деб хабар бермоқда Meduza.

Бу пандемия бошланганидан бери суткалик рекорд кўрсаткичдир. Аввалги рекорд 29 октябрда қайд этилганди. Унда 17 717 та коронавирус билан касалланиш ҳолати қайд этилган.

Россияда ушбу касаллик қайд этилганларнинг умумий сони 1 599 976 нафарга етди. Ушбу кўрсаткич бўйича Россия дунёда тўртинчи ўринда бормоқда.

Янги аниқланган касалланиш ҳолатларининг энг кўпи Москва (+5268 киши), Санкт-Петербург (+801), Москва вилояти (+524), Нижний Новгород (+401) ва Архангельск (+325) вилоятларида қайд этилган.

Сутка давомида COVID-19 оқибатида 355 киши вафот этди. 29 октябрь куни Россияда коронавирусдан кунига 366 ўлим қайд этилганди. Пандемия бошланганидан бери мамлакатда 27 656 киши вафот этган.

Шунингдек, бир сутка ичида Россияда 14 519 киши касалликдан соғайган ва уларнинг умумий сони 1 200 560 кишига етган. Маълум қилинишича, ҳозирда Россияда коронавирус аниқланган 371 760 киши даволанмоқда.

Мамлакатда коронавирусни аниқлаш бўйича сўнгги 24 соат давомида 582 мингта, умумий ҳисобда эса 59,8 миллиондан ортиқ тест ўтказилган.

Аввалроқ Россия Соғлиқни сақлаш вазирлиги шифокорларга коронавирус ҳақида жамоатчиликка гапиришни тақиқлагани хабар қилинганди.