Эмомали Раҳмон бешинчи марта президент қасамёдини қабул қилди

Бешинчи марта Тожикистон президенти этиб сайланган Эмомали Раҳмон конституцияга ва мамлакат халқига содиқликка қасамёд қилди, деб хабар бермоқда Asia Plus.

Эмомали Раҳмонга давлат раҳбари рамзлари — штандарт, белги, биринчи даражали «Ситораи президенти Точикистон» (Тожикистон президенти юлдузи) ордени ва президент гувоҳномаси топширилганидан кейин, у конституцияга ва мамлакат халқига содиқликка қасамёд қилди.

Шундан сўнг президент инаугурация маросими иштирокчилари қаршисида нутқ сўзлаб, Тожикистонни ривожлантиришнинг асосий йўллари ва йўналишларини белгилаб берди.

Шунингдек, у Тожикистон халқига ўзига билдирилган ишонч ҳамда 11 октябрь кунги президент сайловларида берган овозлари учун миннатдорлик билдирди.

Эмомали Раҳмоннинг инаугурация маросими худди 2006 ва 2013 йилдаги каби, бу йил ҳам чет давлатлар раҳбарларисиз бўлиб ўтди.

1999 йилда Эмомали президент қасамёдини иккинчи марта қабул қилаётган вақтда маросимда юқори мансабли хорижлик меҳмонлар қатнашган эди. Унда, хусусан, Россия президенти Владимир Путин иштирок этиб, нутқ ҳам сўзлаган эди.

Қасамёддан сўнг давлат раҳбари кортежи пойтахтдаги «Дўсти» майдонига йўл олди, у ерда Тожикистон куч тузилмалари аскар ва офицерлари иштирокида ҳарбий парад бўлиб ўтади.

Эслатиб ўтамиз, Эмомали Раҳмон 11 октябрь куни бўлиб ўтган республика раҳбарлигига сайловларда овозларнинг 90,92 фоизини тўплаган эди.