USM Holdings компаниясининг энг йирик акциядори Алишер Усмонов коронавирусга қарши курашиш учун Италиянинг Сардиния ороли ҳокимиятига 500 000 евро ўтказди, дея хабар бермоқда «РБК».
Маълум қилинишича, Усмонов томонидан тақдим этилган пул аллақачон вилоят ғазнасига келиб тушган. Шу билан бирга, нашр ҳозирги хайрия пули иккинчиси эканлигини ёзган. Усмонов биринчи марта пандемия бошланганида коронавирусга қарши курашиш учун Сардиния ҳокимиятига пул ажратган.
Ўз навбатида, Tiscali нашри Усмонов томонидан Сардиния маъмурияти раҳбари Кристиан Солинасга юборилган хат матнини нашр этди.
«Сиздан ва бутун Сардиния халқидан 30 йил давомида ушбу гўзал оролда мени илиқ кутиб олишгани учун миннатдорман. Бу Сардинияда касалликка чалинган ва унга қарши курашаётганлар учун қила оладиган энг кичик ҳиссам. Сардиния ҳукуматига ушбу эзгу ишда ёрдам бериш учун бутун қалбим билан яна 500 минг евро тақдим этаман», – дейилади мактубда.
Маълумот учун, 2018 йилда Алишер Усмонов Арсакена Сардиния коммунасининг фахрий фуқароси бўлди. Ўша йили Forbes’га берган интервьюсида у оролда узоқ вақт яшаганлигини айтди.
«Мен ҳали ҳам Италия билан ўзгача муносабатдаман. Деярли бутун ёзни Сардинияда ўтказаман», – дейди Усмонов.
Апрель ойида USM Holdings ўз акциядорлари Россияга янги коронавирус инфекциясини олиб кириш ва тарқалишининг олдини олиш учун штаб-квартиранинг эҳтиёжлари учун 2 миллиард рубль ажратишини эълон қилди. Июль ойида эса Усмонов Ўзбекистонга COVID-19’га қарши курашда ёрдам сифатида қарийб 10 миллион доллар ажратди.
Италия Соғлиқни сақлаш вазирлигининг маълумотларига кўра, Сардинияда COVID-19 пандемияси бошланганидан бери 8,8 мингдан ортиқ касалликка чалиниш ҳолатлари аниқланган. Шу жумладан, охирги кун ичида 282 кишида коронавирус аниқланган. Беморларнинг 207 нафари вафот этган. Худди шу вақт ичида бутун Италияда 616 мингдан ортиқ одамда касаллик аниқланган. Улардан 38 мингдан ортиғи вафот этган.
Мавзуга доир:
Изоҳ (0)