Жалақудуқ тумани ҳокими халқдан, Президентдан узр сўради. Унинг тайинланганига энди бир ой бўлганди

Андижон вилоятининг Жалақудуқ туманида Халқ депутатлари туман кенгашининг олтинчи чақириқ, ўн тўртинчи сессияси бўлиб ўтди. Сессияда туман ҳокими ҳудуд «қониқарсиз» деб топилгани учун халқдан ва давлат раҳбаридан узр сўради дея хабар берди «Дарё» мухбири Умиджон Мамарасулов.

Сессияда сўз олган туман ҳокими Ҳикматилло Латипов сектор раҳбарлари билан бирга йўл қўйилган камчиликлар учун Президент ҳамда туманда яшовчи 185 минг аҳолидан узр сўраган.

Ҳоким, шунингдек 2020—2021 йилларда туманни комплекс ижтимоий-иқтисодий ривожлантириш орқали «қизил» ҳудудлар қаторидан чиқариш бўйича «йўл харитаси»ни тақдим қилиб, ҳудудни 2021 йилда «яхши» туманлар қаторига олиб чиқишга ваъда берган.

«Аввалги ҳокимлар қандай ишлаган, буни билмадим. Аммо йўл қўйилган камчиликларни бартараф этиш менинг зиммамда. Уларни айблашдан кўра, муаммоларга тезроқ ечим топиш мақсадга мувофиқ бўлади. Иқтисодчи бўлганлигим учун асосий эътиборимни кичик ва ўрта бизнесни ривожлантиришга қаратмоқчиман. Бунинг учун туманимизнинг салоҳияти ҳам, имконияти ҳам етарли. Шу кунларда ёшлар тадбиркорлигини ривожлантириш мақсадида 25 ёшгача бўлган ёшлар ўртасида ‘Энг яхши бизнес лойиҳалар’ танловини эълон қилмоқчимиз. Танлов якунида ўз бизнесини бошлаши учун ғолибларга 1-ўрин учун 15 миллион, 2-ўрин учун 10 миллион, 3-ўрин учун 5 миллион сўмдан маблағ ажратамиз. Асосий мақсадимиз иқтисодиётимизни ривожлантириш орқали аҳоли бандлигини таъминлаш», — деди туман ҳокими.

Сессия якунида Президент администрацияси ҳузуридаги Ахборот ва оммавий коммуникациялар агентлиги директорининг биринчи ўринбосари Дилшод Саиджонов сўзга чиқиб, ўзининг фикр мулоҳазаларини билдирган.

Эслатиб ўтамиз, 2020 йил 9 сентябрь куни Халқ депутатлари Жалақудуқ туман кенгашининг навбатдан ташқари сессиясида Ўзбекистон Ҳисоб палатаси шўъба мудири Ҳикматилло Латипов туманга раҳбар этиб тайинланганди.

Аввалроқ Бухоронинг Жондор ва Шофиркон, Наманган вилоятининг Янгиқўрғон ва Мингбулоқ, Андижон вилоятининг Балиқчи, Қашқадарё вилоятининг Касби, Нишон тумани ҳокимлари ҳудуд «қизил»га тушиб қолгани учун халқдан, давлат раҳбаридан узр сўраганди.