Бугунги кунда Тошкент шаҳрининг Фарғона йўли кўчасида таъмирлаш ишлари олиб борилмоқда. Ушбу қурилиш ишлари ҳали якунига етмай, йўлга махсус чизиқлар чизиб қўйилгани ва светофорларнинг йўқлиги ҳайдовчилар эътирозига сабаб бўлмоқда.
Тошкент шаҳар ҳокимлиги томонидан эълон қилинган видеолавҳада ушбу чизиқлар вақтинча экани ва светофорлар қурилиш якунида жойига қўйилиши таъкидланган. Қурилиш монтаж ишлари бўйича директор Икром Ризақулов мазкур таъмирлаш иши бўйича маълумот бериб ўтди.
«Ушбу объектнинг умумий узунлиги 6,7 километр бўлиб, бугунги кунга қадар корхонамиз томонидан ‘Қўйлиқ ота’ мажмуасидан ‘Ислом ота’ масжидигача бўлган 4 километр узунликдаги йўлда, ҳар икки йўналишга 4 тасмали умумий 8 қаторлик йўлни остки қатлам билан асфальтлаш ишлари тўлиқ якунланган.
Бундан ташқари яна 5 сантиметрлик қопламанинг устки қатлами яъни майда доначали зич асфальт-бетондан қоплаб ётқизиш ишлари лойиҳамизда бор. Ҳозир икки қатламли асфальт ётқизилган.
Бугунги кунда автомобиль транспорт воситаларини ҳаракатини вақтинчалик тўхтатиш имкони бўлмагани сабабли ҳаракат хавфсизлигини таъминлаш мақсадида ўзимизнинг корхонамиз томонидан мана шу остки қатлам, яъни йирик донали асфальт-бетон устига йўл чизиқлари чизилган.
Бунинг сабаби ҳаракат хавфсизлигини таъминлаш ва пиёдалар кесиб ўтиш жойларини белгилаш мақсадида ушбу ётиқ чизиқлари вақтинчалик бўлиб, автомобиль йўлининг устки қатлами ётқизилгандан кейин замонавий стандартларга мос равишда термопластик материаллардан фойдаланган ҳолатда узоқ муддатга чидамли бўлган маҳсулотлардан фойдаланиш режалаштирилган.
Корхонамиз томонидан пиёдалар ўтиш чизиқлари чизиб қўйилди, лекин бу ҳам вақтинчалик. Объектдаги ишлар тугаллангандан кейин мукаммал лойиҳа асосида тасдиқланган қўлимиздаги лойиҳа асосида қайтадан йўл чизиқлари чизилади», – дейди Икром Ризақулов.
Шунингдек, Ризақулов светофорлар масаласига ҳам тўхталиб ўтди.
«Ҳайдовчилар томонидан билдирилаётган катта эътирозлардан бири чорраҳаларни тартибга келтирилмаганлиги, яъни светофор қурилмаларини мавжуд эмаслиги, ушбу светофор қурилмалари бугунги кунда қурилишлар олиб борилаётгани сабабли ечиб олинган. Лойиҳага кўра, светофорлар ўрнатилади», – дейди директор.
Маълум қилинишича, режага асосан 2020 йилнинг охирига қадар таъмирлаш ишларини тўла якунланади.
Аввалроқ Фарғона йўли кўчасига ўтиш йўллари 10 октябрга қадар ёпилиши ва шу сабаб 8 та автобус йўналишлари вақтинчалик ўзгартирилиши хабар қилинганди.
Изоҳ (0)