Тошкент вилояти юқумли касалликлар шифохонасининг бош шифокори — вилоят бош инфекционисти Гулжаҳон Йўлдошевага нисбатан қўлланилган қамоққа олиш эҳтиёт чораси ўзгартирилиб, уй қамоғига ўтказилган куни (6 октябрь) шифохонанинг бошқа инфекционисти — Шихназар Рўзметов қамоққа олинди, дея маълум қилмоқда «Xabar.uz»
Унга кўра, Шихназар Рўзметовга Жиноят кодексининг 116-моддаси 3-қисми (шахснинг оғир оқибатга сабаб бўладиган даражада ўз касбига нисбатан бепарволиги ёки инсофсизлик билан муносабатда бўлиши) ва 228-моддаси (ҳужжатларни сохталаштириш) билан айб эълон қилиниб, 2020 йилнинг 6 октябрь куни Жиноят ишлари бўйича Чирчиқ шаҳар суди ажрими билан қамоққа олиш эҳтиёт чораси қўлланган.
Қайд этилишича, эълон қилинган асосий айблов (116-моддаси 3-қисми) эҳтиётсизлик оқибатида содир этилган жиноятлар сирасига киради. Айни айблов судда тасдиқланган тақдирда ҳам энг катта жазо беш йилгача озодликдан маҳрум этиш экани инобатга олинса, қўлланган эҳтиёт чора катта савол туғдиради.
Чунки эҳтиётсизлик оқибатида содир этилган жиноятлар бўйича беш йилдан ортиқ жазо тайинланиши эҳтимоли бўлган тақдирдагина шахсга нисбатан қамоққа олиш чораси қўлланиши мумкинлиги Олий суд Пленуми қарорида алоҳида қайд этилган.
Аввалроқ ЖИБ Чирчиқ шаҳар суди Тошкент вилояти юқумли касалликлар шифохонасининг бош шифокори Г.Йўлдошевага нисбатан қўлланилган ҳибсга олиш тўғрисидаги эҳтиёт чорасини уй қамоғига ўзгартириш киритилганда унинг «аёл экани, олти нафар вояга етмаган фарзанднинг онасилиги» эътиборга олинган эди.
Эътиборли жиҳати, Ш.Рўзметов ҳам деярли Г.Йўлдошева сингари мақомда. Хусусан, Рўзметов касалхонада эндигина шифокор сифатида иш бошлаган. Бундан ташқари у икки нафар вояга етмаган фарзанднинг (иккинчи фарзанди эндигина бир ойлик бўлган) отаси, оиланинг ягона боқувчиси ҳисобланади.
Юқоридаги жиҳатлар инобатга олинса, Рўзметовга нисбатан қамоққа олиш эҳтиёт чорасини қўллаш қай даражада тўғри?
Эслатиб ўтамиз, Гулжаҳон Йўлдошева 6 октябрь куни уй қамоғига ўтказилди. Бундан аввал Олий Мажлис Сенати раиси Танзила Норбоева 2 октябрь куни Гулжаҳон Йўлдошевага қўлланилган эҳтиёт чорасига муносабат билдириб, унинг аёл киши эканлиги ва кичкина боласи борлигини эътиборга олиб, ҳозирча қамоққа олмаслик мумкинлигини айтганди.
Маҳалла ва оилани қўллаб-қувватлаш вазирлиги Гулжаҳон Йўлдошева билан 3 октябрь куни Омбудсман ҳузуридаги миллий превентив механизм (МПМ) доирасида суҳбат ташкил этилгани, вазирлик Гулжаҳон Йўлдошеванинг қамоққа олинганидан ташвишдалигини билдирганди.
Президент Шавкат Мирзиёевнинг тўнғич қизи — Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева 5 октябрь куни вилоят бош инфекционисти билан боғлиқ ишни кузатиб бораётганини маълум қилди ҳамда прокуратурадан Гулжаҳон Йўлдошевага нисбатан қамоққа олиш эҳтиёт чорасини ўзгартиришни сўраб чиқди.
Бош прокуратура 6 октябрь куни Гулжаҳон Йўлдошевага қўлланилган ҳибсга олиш тўғрисидаги эҳтиёт чорасини уй қамоғига ўзгартириш масаласи Чирчиқ прокуратураси томонидан кўриб чиқилаётганини маълум қилди.
Соғлиқни сақлаш вазирлиги эса Бош прокуратура мазкур иш бўйича қамоққа олиш эҳтиёт чораси уй қамоғига ўзгартирилиши кутилаётганини маълум қилиб бўлганидан кейин прокуратура идораларидан Гулжаҳон Йўлдошевага нисбатан бошқа эҳтиёт чорасини танлаш масаласини кўриб чиқишни сўради.
Изоҳ (0)